کیجریوال نے لوگوں سے امن بحال کرنے کی اپیل کی

نئی دہلی،25فروری:دہلی کے وزیراعلی اروند کیجریوال نے دہلی کے کچھ حصوں اور خصوصاً شمال مشرقی دہلی میں پُرتشدد واقعات پر تشویش کا اظہار کرتے ہوئے منگل کو سبھی لوگوں سے امن بحال کرنے کی اپیل کی۔مسٹر کیجریوال نے آج شمال مشرقی دہلی کے سبھی اراکین اور تشدد سے متاثر دیگر علاقوں کے رکن اسمبلی کے علاوہ اعلی افسروں کے ساتھ حالات جائزہ لیا۔انہوں نے بعد میں میڈیا سے بات چیت میں کہا،‘‘دہلی کے سبھی لوگوں سے ہاتھ جوڑ کر درخواست ہے کہ وہ امن بحال رکھنے میں تعاون کریں۔’’وزیراعلی نے کہاکہ تشدد سے کسی مسئلے کا حل نہیں ہوگا اور کسی کے گھراوردکانیں جلانا اچھی بات نہیں ہے ۔انہوں نے کہا کہ سبھی اسپتالوں کو محتاط کیاگیا ہے جو بھی زخمی آئے اس کا علاج کرنے مٰں کسی قسم کی کوتاہی نہ برتی جائے ۔مسٹر کیجریوال نے کہا کہ میٹنگ میں موجود ارکان اسمبلی نے بتایا کہ پولیس کی تعداد کم ہے اور اسے بڑھائے جانے کی ضرورت ہے ۔ارکان اسمبلی کا کہنا تھا کہ تشدد پھیلانے کے لئے لوگ باہر سے آئے ۔انہوں نے کہا کہ پولیس کو کارروائی کرنے کاحکم دیا جائے اور جہاں ضرورت ہو وہاں حالات کو قابو کرنے کے لئے لاٹھی چارج اور ہوا میں فائرنگ کی اجازت بھی دی جائے ۔وزیراعلی نے کہا کہ امن برقرار رکھنے کے لئے مندروں اور مسجدوں سے بھی لوگوں سے اپیل کی جائے ۔پیر سے ہورہے پُر تشدد واقعات میں دہلی پولیس کے ہیڈ کانسٹیبل رتن لال سمیت پانچ لوگوں کی موت ہوگئی ہے اور شاہدرا کے ڈپٹی کمشنر امت شرما سمیت کئی پولیس اہلکار بھی زخمی ہوئے ہیں۔