سرینگر/18فروری: مارکسی کمیونسٹ پارٹی کے جنرل سکریٹری اور سابق رکن پارلیمان سیتا رام یچوری نے جموں و کشمیر میں سوشل میڈیا صارفین کے خلاف درج کی جانے والی ایف آئی آر پر حکومت کو شدید تنقید کا نشانہ بنایا ہے۔سی این آئی مانیٹرنگ کے مطابق سیتا رام یچوری نے مرکزی حکومت پر نکتہ چینی کرتے ہوئے کہا کہ جب حکومت جموں و کشمیر کے حالات کو معمول کے مطابق لانے کی بات کرتی ہے تو وہ وہاں انٹرنیٹ استعمال کرنے والے افراد کے خلاف مقدمہ درج کیوں کر رہی ہے؟’سیتارام یچوری نے ٹویٹ میں لکھا ہے کہ ‘حکومت غیر ملکی وفد کو کشمیر کے ٹور پر لے جاتی ہے اور وہاں وہ صورتحال معمول کے مطابق ہونے کی بات کہتے ہیں۔ لیکن بھارتی رہنماوں کو کشمیر جانے سے روک دیا جاتا ہے اور مقامی لوگوں کو سوشل میڈیا استعمال کرنے پر شدت پسندی کے قوانین کے تحت الزامات عائد کیے جاتے ہیں۔انہوںنے کہا کہ انٹرنیٹ بنیادی حق ہے اور تمام بھارتی شہریوں کا حق ہے۔حکومت کی عوام مخالف کاروائی اور اس کی سوچ پر ہمیں شرم آتی ہے۔جموں وکشمیر پولیس نے پیر کے روز سوشل میڈیا کے استعمال سے متعلق سرکاری احکامات کی خلاف ورزی کرنے پر مختلف افراف کے خلاف مقدمہ درج کیا ہے۔جموں وکشمیر انتظامیہ نے 14 جنوری کو تمام سوشل میڈیا سائٹس پر پابندی عائد کرنے کا حکم جاری کیا تھا تاکہ شرپسندوں کی جانب سے غلط اطلاعات اور افواہوں کی تشہیر کے لیے ان کے غلط استعمال پر روک لگائی جاسکے۔( سی این آئی )
Comments are closed.