پولیس سربراہ کا سرینگر کے کارگو کمپلیکس کا دورہ،اہلکاروں اور افسران سے ملاقات کی

جموں کشمیر پولیس سربراہ نلین پربھات نے سرینگر کے کارگو کمپلیکس کا دورہ کیا، جہاں انہوں نے اسپیشل آپریشنز گروپ کے اہلکاروں اور افسران سے ملاقات کی، ان کی پیشہ ورانہ کارکردگی کا جائزہ لیا اور وادی کشمیر میں امن و امان کے قیام، انسدادِ دہشت گردی کی کارروائیوں اور عوامی تحفظ کے لیے ان کی گرانقدر خدمات کو سراہا۔

ڈی جی پی کے ہمراہ انسپکٹر جنرل آف پولیس کشمیر زون وی کے بردی، سینئر پولیس افسران اور دیگر متعلقہ حکام بھی موجود تھے۔ دورے کے دوران انہیں کارگو کمپلیکس میں تعینات ایس او جی یونٹ کی مجموعی کارکردگی، آپریشنل تیاری، حفاظتی انتظامات اور موجودہ سکیورٹی صورتحال سے متعلق بریفنگ دی گئی۔اس موقع پر ڈی جی پی نلین پربھات نے ایس او جی اہلکاروں سے فرداً فرداً ملاقات کی، ان کے مسائل دریافت کیے اور ان کے بلند حوصلے، پیشہ ورانہ مہارت، فرض شناسی اور جذبہ خدمت کی تعریف کرتے ہوئے کہا کہ جموں و کشمیر پولیس کے جوان انتہائی مشکل اور حساس حالات میں اپنی ذمہ داریاں انجام دے رہے ہیں، جس کے باعث خطے میں امن و استحکام برقرار رکھنے میں نمایاں کامیابیاں حاصل ہوئی ہیں۔