سرحدوں پر جاری کشیدگی کے بیچ ایک اہم پیش رفت ؛ پاک بھارت ڈی جی ملٹری آپریشنز کا ہاٹ لائن رابطہ، بنیادی معاملات کے حل پر اتفاق

سرینگر/25فروری:سرحدوں پر جاری کشیدگی کے بیچ پاکستان اور بھارتی فوج کے ڈائریکٹرجنرل ملٹری آپریشنز نے ہاٹ لائن پر رابطے کے دوران بنیادی معاملات اور خدشات حل کرنے پر اتفاق کیا ہے۔دونوں فریقوں نے تمام معاہدوں پر برقرار رہنے اور افہام و تفہیم کے ذریعے مسائل کو حل کرنے پر اتفاق کیا۔ سی این آئی مانیٹرنگ کے مطانق پاکستان اور بھارت کے درمیان سرحدوں پر جاری کشیدگی کے چلتے جمعرات کو ایک اہم پیش رفت کے تحت پاکستان اور بھارت کے ڈائریکٹرجنرل ملٹری آپریشنز کا ہاٹ لائن پر رابطہ ہوا ہے، جس میں لائن آف کنٹرول اور دیگر تمام سیکٹرز کی صورتحال کا جائزہ لیا گیا۔ پاکستانی شعبہ تعلقات عامہ آئی ایس پی آر کی جانب سے جاری بیان میں کہا گیا ہے کہ پاکستان اور بھارت کے ڈائریکٹرجنرل ملٹری آپریشنز کا ہاٹ لائن پر رابطہ ہوا ہے، جس میں لائن آف کنٹرول اور دیگر تمام سیکٹرز کی صورتحال کا جائزہ لیا گیا۔ پاک بھارت ڈی جی ایم اوز کی گفتگو اچھے ماحول میں ہوئی۔مشترکہ مفادات کے حصول اور خطے میں پائیدار امن کے قیام کے لیے دونوں ممالک کے اوز نے امن کی تباہی اور تشدد کو فروغ دینے والے بنیادی معاملات اور خدشات کو حل کرنے پر اتفاق کیا۔فریقین نے باہمی معاہدوں، سمجھوتوں اور ایل او سی سمیت دیگر سیکٹرز پر جنگ بندی پر 24 اور 25 فروری کی درمیانی رات سے سختی سے عمل درآمد پر اتفاق کیا، ہاٹ لائن گفتگو کے دوران اس بات کا بھی اعادہ کیا گیا کہ کسی بھی غیر متوقع صورتحال یا غلط فہمی کو دور کرنے کے لئے ہاٹ لائن رابطے اور بارڈر فلیگ میٹنگ کا موجودہ طریقہ کار استعمال کیا جائے گا۔ادھر بھارتی وزارت دفاع سے جاری کردہ بیان میں کہا گیا ہے کہ دونوں ڈائریکٹر جنرلز نے سرحدوں پر سکون اور باہمی فائدہ مند اور پائیدار امن کے حصول کے مفاد میں، ایک دوسرے کے بنیادی معاملات اور خدشات کو حل کرنے پر اتفاق کیا۔ دونوں فریقوں نے تمام معاہدوں پر برقرار رہنے اور افہام و تفہیم کے ذریعے مسائل کا حل کرنے پر اتفاق کیا۔ لائن آف کنٹرول پر فائرنگ کی روک تھام کا سلسلہ 24/25 فروری 2021 کی آدھی رات سے ہوگا۔دونوں فریقوں نے اس بات کا اعادہ کیا کہ ہاٹ لائن رابطے اور سرحدی فلیگ میٹنگوں کے موجودہ طریقہ کار کو کسی بھی غیر متوقع صورتحال یا غلط فہمی کو دور کرنے کے لئے استعمال کیا جائے گا ۔