سرینگر/12نومبر: راجوری نوشہرہ اور ضلع پونچھ کے شاہ پورہ ، کیرنی اور قصبہ سیکٹر میں پاکستان اور بھارتی فوج کے مابین شدید گولہ باری ہوئی اس طرح چار تین دنوں سے راجوری اور پونچھ کے مختلف سرحدی علاقوں میں جنگی صورتحال بنی ہوئی ہے ۔ اس دوران دفاعی ذرائع نے پاکستان پر الزام عائد کیا ہے کہ پاکستانی فوج نے جمعرات کے روز بھی جنگ بندی معاہدے کی خلاف ورزی کی گئی جس کا بھر پور جواب فوج نے دیا ۔ کرنٹ نیوز آف انڈیا کے مطابق گزشتہ چار روز سے صوبہ جموں کے مختلف سرحدی علاقوں میں ہندوستان اور پاکستانی افواج کے مابین شدید گولہ باری کا سلسلہ جاری ہے تازہ واقعے میں جمعرات کو ضلع راجوری کے نوشہر ہ اور ضلع پونچھ کے شاہ پور سیکٹر میں ہندوپاک افواج کے مابین گولہ باری کا سلسلہ جاری رہا اور آج مسلسل چوتھے روز بھی ضلع پونچھ کے مختلف سرحدی پٹیوں پر جنگ کا سماں بندھا رہا ۔ اس بیچ کئی سرحدی علاقوں کے لوگوں نے نکل مکانی شروع کی ہے ۔ بتایا جاتا ہے کہ جمعرات کے روز بھی سرحدی ضلع پونچھ میں بھارت اور پاکستانی افواج کے مابین شدید گولہ باری جاری رہی ۔ جبکہ آج راجوری کے نوشہرہ سیکٹر میں بھی ہندوپاک افواج نے ایک دوسرے کی پکٹوں کو نشانہ بناکر موٹار اور دیگر جدید ہتھیاروں سے گولہ باری کی ۔ اس دوران دفاعی ذرائع نے بتایا کہ پاکستانی فوج نے آج ایک مرتبہ پھر جنگ بندی معاہدے کی خلاف ورزی کرتے ہوئے سیولین آبادی اور فوجی چوکیوں کو نشانہ بناتے ہوئے شدید گولہ باری کی جس کے بعد فوج نے بھی پاکستانی فوج کی فائرنگ کا بھر پور جواب دیا ۔ ذرائع کے مطابق سرحدی ضلع پونچھ میں چار دنوں سے پاک فوج بلااشتعال فائرنگ جاری رکھے ہوئے ہیں تاہم ابھی تک اس میں کسی بھی طرح کے جانے نقصان کی اطلاع نہیں ہے ۔ بتایا جاتا ہے کہ ضلع کے مختلف سرحدی علاقوںسے لوگوںنے نکل مکانی شروع کی ہے کیوں کہ ضلع میں آر پار گولہ باری رکھنے کا نام نہیں لے رہی ہے ۔ ۔ یاد رہے کہ ہندوستان اور پاکستان کے مابین جاری سیاسی کشیدگی کے بیچ سرحدوں پر بھی مسلسل کشیدگی بنی ہوئی ہے اور دونوں جانب فوج ایک دوسرے کے ٹھکانوں پر نشانہ سادھتے ہوئے گولہ باری کررہے ہیں جس کی وجہ سے سرحدی علاقوں میں خوف ودہشت کا ماحول پھیل گیا ہے اور کئی جگہوں سے اطلاع ہے کہ لوگ اپنے آشیانوں کو چھوڑ کر محفوظ مقاما ت کی طرف بھاگ رہے ہیں اور کئی علاقوں کے لوگوںنے نزدیکی بنے زمین دوز بنکروں میں پناہ لینے شروع کی ہے ۔
Comments are closed.