آئندہ کئی دنوں تک کسی بھی جگہ بارشوں یا برفباری کا کوئی امکان نہیں/محکمہ موسمیات

شد ید سردی کی لہرجاری ، گزشتہ شب سرینگر میں سرد تردین رات ریکارڈ

سرینگر/02 دسمبر: وادی کشمیراور جموں میں شد ید سردی کی لہر کے بیچ سنیچروار اور اتوار کی درمیانی رات کو ریاست کی سرمائی راجدھانی میں سرد ترین ریکارڈ کی گئی ۔ادھر وادی کے بیشتر مقامات پر کم سے کم درجہ حرارت نقطہ انجماد سے نیچے چلے جانے کی وجہ سے اہل وادی کو سخت شبانہ سردیوں کا سامنا ہے جبکہ محکمہ موسمیات نے بھی آئند ہ کئی دنوں تک موسمی صورتحا ل میں کوئی بھی تبدیلی نہ آنے کا امکا ن ظاہر کرتے ہوئے اہلیان وادی کو مزید سردیوں کیلئے تیار رہنے کا مشورہ دیا ہے ۔کرنٹ نیوز آف انڈیا کے مطابق وادی کے شمال و جنوب میں رات کا درجہ حرارت مسلسل کم ہورہا ہے اوربالائی علاقوں کے ساتھ ساتھ وادی کے میدانی علاقوں میں بھی شبانہ درجہ حرارت میں کمی واقع ہونے سے سردی کی لہر جاری ہے ۔محکمہ موسمیات کے مطابق یکم اور دو دسمبر کی درمیانی را ت سرینگر میں کم سے کم درجہ حرارت منفی 2.7ڈگری سیلشیس ریکارڈ کیا گیا ۔اس رات کے دوران لداخ کاکرگل قصبہ وادی کا سرد ترین علاقہ رہا جہاں کم سے کم درجہ حرارت منفی 9ڈگری سیلشیس ریکارڈ کیا گیا جو کہ رواں موسم میں اب تک کا سب سے کم درجہ حررت ہے۔ لداخ کے ہی کرگل قصبہ میں پارہ گرنے کا سلسلہ جاری ہے، جس کے سبب قصبہ میں ہرگذرتے دن کے ساتھ سردی میں اضافہ ہورہا ہے۔گزشتہ شب لداخ کا کم سے کم درجہ حرارت منفی 9.3ڈگری سیلشیس ریکارڈ کیا گیا۔ادھر گلمرگ میں رات کا کم سے کم درجہ حرارت منفی5.1جبکہ پہلگام میں منفی 3.1ڈگری سیلشیس ریکارڈ کیا گیا۔سی این آئی کے مطابق سخت سردیوں کے باعث سرینگر کے علاوہ وادی کے دیگر حصوں میں نل جم جانے کی وجہ سے لوگوں کو پینے کا پانی حاصل کرنے میں شدید مشکلات کا سامنا کرنا پڑا۔محکمہ موسمیات کا کہنا ہے کہ آنے والے مزید کچھ دنوں میں وادی میں رات کے کم سے کم درجہ حرارت میں مزید کمی واقع ہونے کا امکان ہے کیونکہ ان دنوں مطلع عمومی طور پر صاف رہے گا۔محکمے کے مطابق آئندہ کئی دنوں تک وادی میں کسی بھی جگہ بارشوں یا برفباری کا کوئی امکان نہیں ہے اور وادی کے ساتھ ساتھ لداخ میں بھی دوران شب آسمان صاف رہے گاجس کے نتیجے میں رات کے کم سے کم درجہ حرارت میں مزید کمی واقع ہوگی۔