ماضی کو بھول کر مسائل کے حل کیلئے آگے بڑھنا ہوگا، کشمیر سمیت تمام مسائل کا حل بات چیت سے چاہتے ہیں/شاہ محمد قریشی

پاکستان اور بھارت کو امن کا کوئی موقع ضائع نہیں کرنا چاہیے، مذاکرات کیلئے تمام ادارے اور جماعتیں متفق

سرینگر/29نومبر: ہند پاک مذاکراتی عمل کی بحالی پر ایک مرتبہ پھر زور دیتے ہوئے پاکستان کے وزیر خارجہ شاہ محمود قریشی نے کہا ہے کہ پاکستان اور بھارت کو امن کا کوئی موقع ضائع نہیں کرنا چاہیے۔ سی این آئی مانیٹرنگ کے مطابق کرتارپور کوریڈور تقریب کیلئے پاکستان آنے والے بھارتی صحافیوں نے وزارت خارجہ کا دورہ کیا اور وزیر خارجہ شاہ محمود قریشی نے ان کے اعزاز میں عشائیہ دیا۔ بھارتی صحافیوں سے گفتگو کرتے ہوئے پاکستان کے وزیر خارجہ شاہ محمود قریشی نے کہا کہ پاکستان 70 سال سے دہشتگردی کے خلاف جنگ لڑرہا ہے جس میں ہمارے 75 ہزار افراد ہلاک ہوئے اور 123 ارب ڈالر کا نقصان ہوا۔پاکستانی وزیر خارجہ نے کہا کہ دہشتگردی ختم کرنے کیلئے مشترکہ کوششیں ضروری ہیں، خطے میں پائیدار ترقی امن سے وابستہ ہے، پاکستان اور بھارت خطے کے اہم ممالک ہیں، دونوں کو موسمیاتی تبدیلیوں سمیت مشترکہ چیلنجز کا سامنا ہے، بھارت کے ساتھ مذاکرات کیلئے پاکستان کے تمام ادارے اور جماعتیں متفق ہیں۔شاہ محمود قریشی نے کہا کہ ہم مشرقی اور مغربی سرحد پر امن اور بھارت کے ساتھ دوستانہ تعلقات چاہتے ہیں، پاکستان اور بھارت مذاکرات سے مسائل حل کرسکتے ہیں، بات چیت کے بغیر مسائل حل نہیں ہوں گے۔وزیر خارجہ کا کہنا تھا کہ ماضی کو بھول کر مسائل کے حل کیلئے آگے بڑھنا ہوگا، کشمیر سمیت تمام مسائل کا حل بات چیت سے چاہتے ہیں، پاکستان اور بھارت کو پائیدار امن کا کوئی موقع ضائع نہیں کرنا چاہیے، سارک ممالک کا خطے میں اہم کردار ہے۔