اسکولوں میں گرمائی تعطیل میں توسیع کا حمتی فیصلہ کل لیا جائے گا / سکینہ ایتو

جموں و کشمیر کی وزیر تعلیم سکینہ ایتو نے کہا ہے کہ وادی کشمیر اور جموں صوبے کے سرمائی علاقوں میں اسکولوں کی موسم گرما کی تعطیلات میں توسیع کے حوالے سے حکومت اتوار کو حتمی فیصلہ کرے گی۔ انہوں نے واضح کیا کہ موجودہ موسمی صورتحال کا باریک بینی سے جائزہ لیا جا رہا ہے اور اسی بنیاد پر اسکول دوبارہ کھولنے یا تعطیلات میں توسیع کرنے کا فیصلہ کیا جائے گا۔

وزیر تعلیم نے ذرائع ابلاغ کے نمائندوں سے گفتگو کرتے ہوئے کہا کہ موسم گرما کی تعطیلات کا ابھی ایک دن باقی ہے اور حکومت محکمہ موسمیات کی تازہ رپورٹوں کا مسلسل جائزہ لے رہی ہے۔

انہوں نے کہا”تعطیلات میں ابھی ایک دن باقی ہے۔ ہم موسمی حالات کا بغور جائزہ لے رہے ہیں اور حکومت بہت جلد اس بارے میں حتمی فیصلہ کرے گی کہ تعطیلات میں توسیع کی جائے یا اسکول مقررہ وقت پر کھولے جائیں“۔