حکومت کی جانب سے پبلک ٹرانسپورٹ میں خواتین اور جسمانی طو ر نا خیز افراد کیلئے مخصوص سیٹیں لازمی قرار

جموں و کشمیر کے ٹرانسپورٹ محکمہ نے تمام پبلک گاڑیوں میں خواتین اور خاص طور پر معذور افراد کیلئے سیٹوں کی ریزرویشن کو لازمی قرار دینے کے لیے سخت ہدایات جاری کی ہیں

ٹرانسپورٹ کمشنر کے دفتر کی طرف سے جاری کردہ سرکیولر کے مطابق حکام نے مشاہدہ کیا کہ پرمٹ ہولڈرس اور وہیکل آپریٹروں کی جانب سے خواتین اور معذور افراد کیلئے سیٹوں کی ریزرویشن سے متعلق سابقہ ہدایات پر عمل درآمد نہیں کیا جا رہا ہے، جس سے مطلوبہ فائدہ اٹھانے والوں کو تکلیف اور مشکلات کا سامنا کرنا پڑ رہا ہے۔

یکساں نفاذ کو یقینی بنانے اور خواتین اور خاص طور پر معذور مسافروں کے مفادات کے تحفظ کیلئے محکمہ ٹرانسپورٹ نے فوری تعمیل کے لیے تفصیلی ہدایات کا اعادہ کیا ہے۔
سرکیولر کے مطابق بڑی بسوں میں 1 سے 12 تک کی سیٹیں اور درمیانی اور منی بسوں میں 1 سے 9 تک کی سیٹیں خصوصی طور پر خواتین اور خاص طور پر معذور افراد کے لیے مخصوص رہیں گی۔ ریزرویشن کو لازمی قرار دیا گیا ہے اور پبلک ٹرانسپورٹ گاڑیوں کے آپریشن کے لیے سرکاری اجازت نامے کی شرائط کا حصہ ہے۔