امر ناتھ یاترا: زائرین کی تعداد چار لاکھ سے متجاوز،سٹیک ہولڈرس کا شکریہ: منوج سنہا

سری نگر،31جولائی

جنوبی کشمیر میں واقع مقدس امرناتھ گپھا کی یاترا کے دوران اس سال اب تک چار لاکھ سے زائد عقیدت مندوں نے درشن کیے ہیں۔

لیفٹیننٹ گورنر منوج سنہا نے سماجی رابطہ ویب سائٹ "ایکس” (سابقہ ٹویٹر) پر تحریر کیا:’بابا امرناتھ ناممکن کو ممکن بناتے ہیں۔ ان کی کرپا سے آج یاترا نے چار لاکھ کے عدد کو عبور کر لیا۔ میں بھگوان شیو کو نمن کرتا ہوں اور ان تمام افراد کا شکریہ ادا کرتا ہوں جنہوں نے اس مقدس یاترا کو ایک روحانی تجربہ بنانے میں اپنا کردار ادا کیا۔‘

انہوں نے کہا کہ ملک اور دنیا بھر سے عقیدت مندوں کی آمد اور یاتریوں کی غیر معمولی تعداد اس بات کا ثبوت ہے کہ بھارت نہ صرف ایک جُٹی ہوئی قوم ہے بلکہ ہر چیلنج سے نپٹنے کے لیے تیار بھی ہے۔ میں ان تمام بھکتوں کا شکریہ ادا کرتا ہوں جنہوں نے اپنے غیر متزلزل بھروسے کے ذریعے ہماری روحانی وراثت کو تقویت بخشی۔
لیفٹیننٹ گورنر نے امرناتھ یاترا کو ایک منفرد روحانی سفر قرار دیتے ہوئے کہا:’یہ مقدس یاترا صرف اس لیے بے مثال نہیں کہ یہ کٹھن اور صبر آزما ہے بلکہ اس لیے کہ یہ خالص روحانی مسرت کا سفر ہے۔ یہ تجربہ نہ صرف اندرونی خود شناسی کا موقع فراہم کرتا ہے بلکہ عقیدت مندوں کے دلوں میں اعتماد اور شکرگزاری سے بھر دیتا ہے۔‘