یوم آزادی 2025کی تقریب : ایس ایس پی گاندربل کی صدار ت میں سیکورٹی جائزہ اجلاس منعقد

ریاض بٹ

گاندربل /21جولائی یوم آزادی 2025کے پیش نظر سنیئر سپر انٹنڈنٹ آف پولیس گاندربل خلیل محمد پوسوال نے سیکورٹی صورتحال کا جائز ہ لینے کیلئے ایک میٹنگ کی صدارت کی ۔ میٹنگ میں ضلعی پولیس، سی آر پی ایف اور دیگر سی اے پی ایف کے سینئر افسران نے شرکت کی جو امن و امان کو برقرار رکھنے اور آئندہ قومی تقریب (یوم آزادی) کیلئے لیے ایک محفوظ ماحول کو یقینی بنانے میں شامل تھے۔میٹنگ کے دوران سیکورٹی انتظامات کے متعدد پہلووں پر تفصیلی بات چیت کی گئی، جن میں پنڈال کی سیکورٹی ، انٹیلی جنس معلومات، علاقے کے تسلط، گشت کے منصوبے اور ٹریفک ریگولیشن شامل ہیں۔

تمام سیکورٹی ایجنسیوں کے درمیان حقیقی وقت میں رابطہ کاری، اہلکاروں کی موثر تعیناتی، اور ضلع بھر میں تمام حساس مقامات کی چوکس نگرانی پر زور دیا گیا۔ایس ایس پی گاندربل نے نگرانی کے طریقہ کار کو مضبوط بنانے کیلئے واضح ہدایات جاری کیں جن میں سی سی ٹی وی کی تنصیب، داخلی مقامات پر چیکنگ اور مختلف چوکیوں پر گاڑیوں کی بے ترتیب چیکنگ شامل ہے۔

انہوں نے احتیاطی پولیسنگ کے اقدامات، کمیونٹی رابطہ اور کسی بھی ناخوشگوار واقعے کی صورت میں فوری ردعمل کی صلاحیتوں کی اہمیت پر بھی زور دیا۔اس کے علاوہ یوم آزادی کی تقریب کے مرکزی مقام کو محفوظ بنانے، ریہرسلوں کے محفوظ اور ہموار انعقاد کو یقینی بنانے اور تقریب کے دوران ضلع بھر میں پرامن ماحول کو برقرار رکھنے پر خصوصی توجہ دی گئی۔ایس ایس پی گاندربل خلیل احمد پوسوال نے اس بات کا اعادہ کیا کہ امن میں خلل ڈالنے کی کوشش کرنے والے کسی بھی عنصر کے خلاف صفر رواداری کا مظاہرہ کیا جائے گا اور تمام حفاظتی انتظامات سول انتظامیہ اور انٹیلی جنس ونگز کے ساتھ قریبی ہم آہنگی کے ساتھ کئے جائیں گے۔

اجلاس تمام شریک ایجنسیوں کے مشترکہ عزم کے ساتھ اختتام پذیر ہوا کہ ضلع میں یوم آزادی 2025 کی پرامن، محفوظ اور باوقار تقریب کو یقینی بنانے کے لیے مکمل ہم آہنگی سے کام کریں۔