کنٹرول لائن پر تناو برقرار،پاکستانی فوج کی پھر بلا اشتعال فائرنگ

سری نگر،2 مئی

فوجی ذرائع کا کہنا ہے کہ پاکستانی فوج نے مسلسل آٹھویں بار جنگ بندی معاہدے کی خلاف ورزی کرکے جمعہ اور ہفتے کی درمیانی شب جموں وکشمیر کے سرحدوں پر بلا اشتعال فائرنگ کی۔

انہوں نے کہا ’’ یکم اور 2 مئی 2025 کی درمیانی شب، پاکستانی فوج کی چوکیوں نے جموں و کشمیر کے کپوارہ، بارہمولہ، پونچھ، نوشہرہ اور اکھنور کے مقابل لائن آف کنٹرول (ایل او سی) کے پار سے بلا اشتعال چھوٹے ہتھیاروں سے فائرنگ کی۔‘‘

انہوں نے کہا کہ وہاں تعینات فوجی جوانوں نے اس کا موثر انداز میں جواب دیا۔ تاہم کسی بھی جانب کسی جانی نقصان کی کوئی اطلاع نہیں ہے۔

ہندوستان اور پاکستان کے ڈائریکٹر جنرل ملٹری آپریشنز کے درمیان منگل کو ہاٹ لائن پر بات چیت کے باوجود جنگ بندی معاہدے کی خلاف ورزیوں کا سلسلہ جاری ہے۔

واضح رہے کہ ایل او سی پر فائرنگ کا تبادلہ 22 اپریل کو پہلگام میں بہیمانہ دہشت گردانہ حملے کے بعد ہندوستان اور پاکستان کے درمیان بڑھتی ہوئی کشیدگی کے درمیان ہوا تھا جس میں 25 سیاحوں اور ایک مقامی باشندے کی موت ہوئی تھی۔

جنگ بندی کی خلاف ورزیوں کا یہ سلسلہ 24 اور 25 اپریل کی رات کو کپوارہ ضلع کے نوگام سیکٹر میں شروع ہوا تھا جو تواتر کے ساتھ جاری ہے۔ 25 اور 26 اپریل کی درمیانی شب پاکستانی فوجیوں نے کشمیر ایل او سی کے ساتھ کئی سیکٹروں میں فائرنگ کی اور پھر 26 اور 27 اپریل کو یہ سلسلہ جاری رہا اور بارہمولہ کے بونیار اوڑی علاقے میں نوگام میں توتماری گلی اور رام پور کے مقابل ہندوستانی ٹھکانوں کو نشانہ بنایا گیا۔ 27 اور 28 اپریل کی درمیانی شب کپوارہ اور پونچھ اضلاع میں دوبارہ جنگ بندی کی خلاف ورزی کی گئی اور اس کے بعد 28 اور 29 اپریل کی درمیانی سب کپوارہ، بارہمولہ اور اکھنور میں ہندوستانی ٹھکانوں کو نشانہ بنایا گیا۔

ادھر ہندوستان اور پاکستان کے درمیان بڑھتی ہوئی کشیدگی کے پیش نظر جموں خطے میں بین الاقوامی سرحد (آئی بی) اور لائن آف کنٹرول (ایل او سی) کے قریب واقع گاؤوں میں رہنے والے لوگ زیر زمین بینکروں کی صفائی، کھیتوں کی فصلیں کاٹنے اور کسی بھی ممکنہ صورتِ حال کا سامنا کرنے کے لیے خود کو تیار کر رہے ہیں۔

مقامی لوگوں کا کہنا ہے کہ کسی کو معلوم نہیں کہ اگلا لمحہ کیا لائے گا، ہم نے فیصلہ کیا ہے کہ زیر زمین بینکروں کی صفائی کریں تاکہ خدا نخواستہ گولہ باری یا فائرنگ کی صورت میں ہم اپنی جانیں بچا سکیں۔

واضح رہے کہ ہندوستان اور پاکستان کے درمیان مجموعی طور پر 3,323 کلومیٹر طویل سرحد قائم ہے، جس میں سے 221 کلومیٹر بین الاقوامی سرحد (آئی بی) اور 744 کلومیٹر لائن آف کنٹرول (ایل او سی) جموں و کشمیر میں واقع ہے۔