محکمہ جل شکتی کے عارضی ملازمین کا سری نگر میں احتجاج

سری نگر، 3 اکتوبر

محکمہ جل شکتی کے عارضی ملازمین کی ایک بڑی تعداد نے منگل کے روز یہاں پریس کالونی میں ایک بار پھر جمع ہو کر اپنے مطالبات کو لے کر احتجاج درج کیا۔احتجاجیوں نے ہاتھوں میں بینرس اٹھا رکھے تھے اور وہ جم کر نعرہ بازی کر رہے تھے۔

اس موقع پر پی ایچ ای ڈیلی ویجرس فورم کے صدر سجاد احمد پرے نے میڈیا کے ساتھ بات کرتے ہوئے کہا کہ آج محکمہ جل شکتی میں کام کرنے والے تمام عارضی ملازمین سرا پا احتجاج ہیں۔

انہوں نے کہا کہ ہمارا مطالبہ ہے حکومت ہمارے ساتھ کئے گئے وعدوں کو پورا کرے۔ان کا کہنا تھا: ‘وزیر اعظم نریندر مودی اور وزیر داخلہ امیت شاہ نے 9 اگست 2019 کے بعد پارلیمنٹ میں جو وعدہ کیا تھا کہ عارضی ملازمین کی نوکریوں کو مستقل کیا جائے گا، اس وعدے کو پورا کرنے کی ضرورت ہے’۔انہوں نے کہا: ‘وزیر اعظم اور ویزر داخلہ انتخابی مہم کے لئے یہاں آ رہے ہیں ان سے گذارش ہے وہ اپنا یہ وعدہ پورا کریں’۔ یو این آئی