سری نگر ، 15اگست : وادی کشمیر میں ملک کے 72 ویں یوم آزادی کی تقریبات کے پیش نظر تمام مواصلاتی کمپنیوں کی موبائیل انٹرنیٹ اور کالنگ سروسز معطل کردی گئی ہیں۔
سرکاری ذرائع نے بتایا کہ یہ قدم امن دشمن عناصر کی جانب سے مواصلاتی خدمات کے غلط استعمال کو روکنے کے لئے اٹھایا گیا ہے۔ معطلی کا مقصد یہ بھی ہے کہ کسی بھی طرح کی افواہوں کو پھیلنے سے روکا جائے۔ انٹرنیٹ اور کالنگ سروسز کی معطلی کی وجہ سے مقامی لوگوں، امرناتھ یاتریوں اور سیاحوں کو شدید مشکلات کا سامنا کرنا پڑرہا ہے۔ جبکہ الیکٹرانک بزنس اور ای بینکنگ کا نظام پوری طرح سے ٹھپ ہو کر رہ گیا ہے۔
وادی میں تمام مواصلاتی کمپنیوں کی انٹرنیٹ اور کالنگ سروسز منگل اور بدھ کی درمیانی رات کو منقطع کی گئی ہیں۔ تاہم سرکاری مواصلاتی کمپنی بی ایس این ایل کی براڈ بینڈ انٹرنیٹ خدمات کو معطلی سے مستثنیٰ رکھا گیا ہے۔ کشمیر کے حالات پر گہری نگاہ رکھنے والے مبصرین کا کہنا ہے کہ یوم آزادی یا یوم جمہوریہ کے موقعوں پر وادی میں مواصلاتی نظام پر قدغن عائد کرنا کوئی نئی بات نہیں ہے۔
وادی میں صارفین کا کہنا ہے کہ انٹرنیٹ خدمات کی معطلی اب وادی میں روز مرہ کا معمول بن چکا ہے۔ وادی میں سیکورٹی اداروں کا ماننا رہا ہے کہ واد ی میں پاکستان نوجوانوں کو احتجاج پر اکسانے کے لئے سماجی رابطوں کی ویب سائٹوں کا بڑے پیمانے پر استعمال کررہا ہے۔
یو این آئی.
Comments are closed.