’’چلہ بچہ‘‘ نے آخری ایام میں اپنے موجودگی کا احساس دلایا

سرینگر/28فروری : موسم سرماء کے آخرے چلہ ’’چلہ بچہ ‘‘نے اگرچہ رواںبرس کافی نرمی برتائی تاہم آخری ایام میں موسم کو بدل ڈالا جس کے نتیجے میں آج وادی کے بالائی علاقوں میں ہلکی برفباری ہوئی جبکہ میدانی علاقوں میں بوندا باندی ہوئی جس کے نتیجے میں درجہ حرارت میں گراوٹ دیکھنے کوملی ۔ ادھر محکمہ موسمیات نے سنیچر وارکو بھی موسم کی خرابی کی پیشن گوئی کرتے ہوئے اتوار سے موسم بہتر ہونے کا امکان جتایا ہے ۔ کرنٹ نیوز آف انڈیا کے مطابق وادی کشمیر میں موسم سرماء کے ابتدائی دنوں میں ہی نومبر 4کو وادی میں بھاری برفباری ہوئی جس کے بعد ماہ دسمبر میں بھی کئی دفعہ بارشیں اور برفباری ہوئی تاہم چلہ کلاں کے 40دن ختم ہونے کے ساتھ ہی موسم میں کافی حد تک بہتری آئی اور ماہ جنوری اور فروری میں موسم خوشگوار رہنے کے نتیجے میں اہلیان وادی نے راحت کی سانس لی ۔ ادھر چلہ گرد نے بھی کافی نرمی دکھائی جبکہ ’’آخری دس دنوں پر محیط چلہ بچہ‘‘ میں بھی موسم بہتر رہا اور دن بھر دھوپ رہتی تھی تاہم آخری ایام میں چلہ بچہ نے اپنی موجودگی کا احساس دلاتے ہوئے وادی کے بالائی علاقوں میں ہلکی برفباری جبکہ میدانی علاقوں میں درمیانہ درجے کی بارش کے ساتھ ساتھ کہیں کہیں پر بوندا باندی دن بھر جاری رہی جس کے نتیجے میں درجہ حرارت میں گراوٹ دیکھنے کو ملی ۔ ادھر شہر سرینگر آج دن کا زیادہ سے زیادہ درجہ حرارت 8ڈگری سیلسیس ریکارڈ کیا گیا جبکہ کل رات کا کم سے کم 4اشاریہ صفر ڈگری درج کیا گیا ۔ دریں اثناء محکمہ موسمیات نے اگلے چوبیس گھنٹوں میں یعنی سنیچروار کو بھی موسم کی صورتحال جوں کی توں رہنے کی پیشن گوئی کرتے ہوئے کہا ہے کہ اتوار سے موسم ایک بار پھر بہتر ہونے کی امید ہے ۔ادھر سونہ مرگ کی پہاڑیوں پر آج ایک بار پھر ہلکی برفباری ہونے کی اطلاع ہے جبکہ افروٹ پہاڑیوں پر بھی ہلکی برفباری ہوئی ہے ادھر گلمرگ اور دیگر پہاڑی علاقوں سے بھی اطلاع ہے کہ جمعہ کی صبح سے ہی ہلکی برفباری کے ساتھ ساتھ بیچ بیچ میں بارشیں ہوئیں۔