پونچھ میں ایل او سی کے نزدیک فوجی کیمپ میں زوردار دھماکہ

جموں ، جموں کشمیر کے ضلع پونچھ میں لائن آف کنٹرول (ایل او سی) کے نزدیک واقع فوجی کیمپ میں منگل کے روز ایک پراسرار دھماکہ ہوا۔

دفاعی ذرائع نے بتایا کہ ضلع پونچھ میں ایل او سی کے نزدیک فوجی بریگیڈ کیمپ کے اندر منگل کی صبح ایک زور دار دھماکہ ہو ا۔ انہوں نے بتایا ’سمجھا جارہا ہے کہ یہ دھماکہ کیمپ میں ہی کسی دھماکہ خیزمواد کے پھٹنے سے ہوا ہے۔ متعلقہ جانچ ایجنسی کی طرف سے واقعہ کی ہر زاویے سے جانچ کی جارہی ہے‘ ۔

جموں میں مقیم دفاعی ترجمان کرنل دویندر آنندنے بتایا کہ یہ دھماکہ کیمپ میں ایک خالی مقام پر ہوا اور اس میں کسی جانی نقصان کی کوئی اطلاع نہیں ہے ۔ ایس ایس پی پونچھ راجیو پانڈے کا کہنا ہے کہ یہ دھماکہ ظاہری طور پر سرحد پار سے داغے گئے بارودی شیل کے پھٹنے سے ہوا ہے۔

انہوں نے کہا ’ظاہری طور پر سرحد پار سے داغا جانے والا بارودی شیل کیمپ کے اندر گرکر پھٹ گیا ہے۔ اس کے پھٹنے سے ایک شیڈ تباہ ہوا ہے۔ دھماکے سے شیڈ میں آگ بھی لگی تھی۔ دھماکے کی اصل وجہ جاننے کی کاروائی جاری ہے‘۔

یو این آئی