مسئلہ کشمیر کی حساسیت کو نظر انداز نہیں کیا جاسکتا:مزاحمتی قیادت

سرینگر: مشترکہ مزاحمتی قیادت سید علی گیلانی، میرواعظ ڈاکٹر مولوی محمدعمر فاروق اور محمد یاسین ملک نے دوران خانہ و تھانہ نظر بندی اپنے ایک مشترکہ بیان میںکہا ہے کہ حکومت ہند جموں وکشمیر کی سنگین زمینی صورتحال اور مسئلہ کشمیر کی حساسیت کو نظر انداز کرکے جس طرح انتخابات کا لاحاصل مشق جاری رکھنے اورمصنوعی اور نمائشی اقدامات اٹھانے میں مصروف ہے اس سے کشمیری عوام کو کوئی دلچسپی نہیں ہے۔

موصولہ بیان کے مطابق قائدین نے کہا کہ ایک بلند نصب العین کے حصول کیلئے پوری قوم کے ساتھ ساتھ آج ہمارے پڑھے لکھے نوجوان اپنا گرم گرم خون دیکر حق خودارادیت کی تحریک کی آبیاری کررہے ہیں لہٰذا حکومت ہند کو یہ سمجھنا چاہئے کہ وہ کشمیری عوام کے اصل جذبات اور احساسا ت کا ادراک کرکے ایسے اقدامات یقینی بنائے جس سے نہ صرف خون خرابہ کو روکا جا سکے بلکہ دیرینہ مسئلہ کشمیر کے مستقل حل کیلئے راہ ہموار ہو سکے ۔

رواں بلدیاتی انتخابات کے تیسرے مرحلے پر ان انتخابات کے تئیں کشمیری حریت پسند عوام کے اظہار لاتعلقی اور ہمہ گیر احتجاجی ہڑتال کو یہاں کے عوام کی تحریک حق خود ارادیت کے تئیں بے مثال وابستگی کا مظاہرہ قرار دیتے ہوئے کہا ہے کہ کشمیری عوام کی غالب اکثریت نے جس طرح ہر مرحلے پر اور ہر نازک وقت میں حکمرانوں کی جانب سے تھوپے گئے نام نہاد انتخابات کو الگ تھلگ رکھا وہ نہ صرف حکومت ہندوستان بلکہ پوری عالمی برادری کےلئے چشم کشا ہے اور لوگوں کا ان انتخابات کے تئیں اظہار بیزاری اس بات کا ثبوت ہے کہ وہ کسی بھی قیمت پر ہزاروں نفوس کے خون کے مزین تحریک آزادی سے دستبرداری کا تصوربھی نہیں کرسکتے۔

قائدین نے یہ بات زور دیکر کہی کہ ارباب اقتدار کواس حقیقت کو تسلیم کرلینا چاہئے کہ کشمیری عوام نہ تو کسی طرح کے انتخابات پر یقین رکھتے ہیں اور نہ مراعات و مفادات کی لالچ انہیں اپنے حق سے دستبرداری کے لئے آمادہ کرسکتی ہے بلکہ یہاں کے عوام صرف مسئلہ کشمیر کا ایک آبرومندانہ حل چاہتے ہیں جس کے لئے یہاں کے عوام نے گذشتہ 7 دہائیوں کے دوران بے شمار جانی و مالی قربانیاں پیش کی ہےں اور یہ سلسلہ آج بھی جاری ہے۔

قائدین نے یہ بات پھر دہرائی کہ کشمیری عوام کا صرف ایک ہی نعرہ اور مطالبہ ہے No All Election Only Right of Self Determination ۔قائدین نے اس امید کا اظہار کیا کہ آنے والے نام نہاد انتخابات کے آخری مرحلے پر بھی عوام اسی تحریک نوازی اور حریت پسندی کا مظاہرہ کرتے ہوئے ان انتخابات سے الگ تھلگ رہ کر پوری دنیا پر واضح کرینگے کہ وہ صرف دیرینہ تنازعہ کشمیر کا یہاں کے عوام کی امنگوں اور خواہشات کے مطابق ایک دیر پا حل کے متمنی ہیں۔

اس دوران قائدین نے بابا گنڈ پلوامہ میں ایک عسکری معرکے کے دوران شہید گئے عسکریت پسند شہید شبیر احمد کو شاندار الفاظ میں خراج عقیدت ادا کرتے ہوئے کہا کہ ایک بلند نصب العین کےلئے بہایا جارہا خون ایک دن رنگ لا کر رہیگا اور ان شہیدوں کی قربانی عنقریب کشمیری عوام کی مکمل فتح و کامرانی پر منتج ہوگی۔