جموں وکشمیرکی ابترصورتحال کیلئے پاکستان ذمہ دار

جنگجوئیانہ سرگرمیوں میں کمی لیکن بی جے پی،پی ڈی پی اتحادکاتجربہ ناکام :راجناتھ سنگھ

نئی دہلی:مرکزی وزیرداخلہ راجناتھ سنگھ نے جموں وکشمیرمیں امن وقانون کی ابترصورتحال اورجنگجوئیانہ سرگرمیاں جاری رہنے کیلئے پاکستان کوذمہ دارٹھہراتے ہوئے کہاہے کہ ریاست میں حالات کوبہتربنانے میں ہمسایہ ملک بڑ ی رکاﺅٹ ہے۔

جمعہ کے روزنئی دہلی میں ذرائع ابلاغ کے نمائندوں سے بات کرتے ہوئے مرکزی وزیرداخلہ کاکہناتھاکہ جموں وکشمیرکے لوگ بشمو ل کشمیری امن اورجمہوریت کے طرفدارہیں ،اوروہ ہرجمہوری عمل میں حصہ لینے کے حق میں ہیں ۔انہوں نے دعویٰ کیاکہ جموں وکشمیرمیں 90فیصدلوگ بلدیاتی اورپنچایتی انتخابات میں حصہ لینے کے خواہشمندہیں ۔انہوں نے تاہم کہاکہ ریاست بالخصوص کشمیر وادی میں ایسے حالات پیداکئے گئے ہیں کہ لوگوں میں ڈرپایاجاتاہے ۔

بلدیاتی انتخابات میں اُمیدواروں کی کمی اوربڑی تعدادمیں اُمیدواروں کے بلامقابلہ کامیاب ہوجانے کے بارے میں راجناتھ سنگھ کاکہناتھاکہ یہ کوئی نئی یاغیرمعمولی بات نہیں ۔انہوں نے کہاکہ مغربی بنگال میں کرائے گئے پنچایتی انتخابات میں 43فیصداُمیدواربلامقابلہ کامیاب قراردئیے گئے ،اوراگرکشمیرمیں بھی ایساہواتویہ کوئی غیرمعمولی بات نہیں ۔

خبررساں ادارے پریس ٹرسٹ آف انڈیاکے مطابق مرکزی وزیرداخلہ راجناتھ سنگھ نے جموں وکشمیرکی صورتحال میں ہنوزبگاڑہونے کااعتراف کرتے ہوئے کہاکہ ہم وہاں حالات کوبہتربنانے کیلئے کوشاں ہیں لیکن پاکستان میں اس میں رکاﺅٹ ڈال رہاہے ۔انہو ں نے مزیدکہاکہ ریاست میں سال1995میں 6000جنگجوئیانہ واقعات رونماہوئے تھے جبکہ سال 2017میں صرف360ایسے واقعات پیش آئے ۔

تاہم انہوں نے کہاکہ امن وقانون کی صورتحال کوبہتربنانے اورجنگجوئیانہ سرگرمیوں پرلگام دینے کیلئے ابھی بہت کچھ کرنے کی ضرورت ہے ۔راجناتھ سنگھ کاکہناتھاکہ جموں وکشمیرمیں حالات کوبہترہوناچاہئے کیونکہ ماضی کے مقابلے میں اب وہاں جنگجوئیانہ سرگرمیاں اورواقعات کافی حدتک کم ہوگئے ہیں ۔انہوں نے کہاکہ بھارت نے پاکستان کیساتھ تعلقات کوبہتربنانے کیلئے اپنی جانب سے کافی کوششیں کیں لیکن ہمسایہ ملک اپنے وطیرے اورپالیسی میں تبدیلی لانے کوتیارنہیں ۔

مرکزی وزیرداخلہ راجناتھ سنگھ کے بقول پاکستان نے جموں وکشمیرکواپنی بھارت مخالف سرگرمیوں کامرکزبنایاہواہے کیونکہ سرحدپارسے ہی جنگجوﺅں کوہرطرح کی مددفراہم کی جاتی ہے ۔ایک سوال کاجواب دیتے ہوئے راجناتھ سنگھ کاکہناتھاکہ گزشتہ اسمبلی انتخابات میں صوبہ جموں اورکشمیروادی کے عوام کی جانب سے دئیے گئے منڈیٹ کی بنیادپربی جے پی اورپی ڈی پی کے درمیان اتحادہواتھالیکن دونوں جماعتوں کے اتحادکایہ تجربہ ناکام ثابت ہوا۔