بھارتی جنگی جنون قابل مذمت ،کسی بھی جارحیت اور مہم جوئی کے خلاف پورا پاکستان متحد / شہباز شریف

پاکستان امن کے فروغ کیلئے جنوبی ایشیا اور اپنے ہمسایہ ممالک کوانتہائی اہمیت دیتا ہے / قریشی

سرینگر: پاکستان کے وزیرخارجہ شاہ محمود قریشی کا کہنا ہے کہ پاکستان امن وامان کے فروغ کے لئے جنوبی ایشیا اور اپنے ہمسایہ ممالک کوانتہائی اہمیت دیتا ہے۔ادھر سابق وزیراعلیٰ پنجاب شہباز شریف نے بھارتی جنگی جنون کی مذمت کرتے ہوئے کہا کہ کسی بھی بھارتی جارحیت اور مہم جوئی کے خلاف پورا پاکستان متحد ہے۔سی این آئی مانیٹرنگ کے مطابق پاکستان کے وزیرخارجہ محمو د شاہ محمود قریشی نے نیپالی وزیرخارجہ اورچیئرآف سارک پردیپ کمارگیا والی سے ٹیلی فونک رابطہ کیا اور خطے میں امن وامان کی صورتحال پرتبادلہ خیال کیا۔ شاہ محمود قریشی نے کہا کہ سارک فورم کا مقصد خطے کے ممالک کو قریب لانا ہے، سارک جنوبی ایشیا میں قیام امن کیلئے اپنا تعمیری کردارادا کرے، پاکستان امن و امان کے فروغ کے لئے جنوبی ایشیا اوراپنے ہمسایہ ممالک کو انتہائی اہمیت دیتا ہے۔نیپالی وزیر خارجہ نے کہا کہ خطے میں امن و امان کا قیام سب کی بنیادی ذمہ داری ہے، نیپال، سارک کا ممبر ہونے اور پاکستان کا دوست ہونے کے ناطے پختہ یقین رکھتا ہے کہ امن کی پاسداری سب کے یکساں مفاد میں ہے۔، اسی دورا ن پاکستان کے صوبہ پنجاب کے سابق وزیر اعلیٰ شہباز شریف کا کہنا تھا کہ پاکستان کی عزت، وقار اور سلامتی کے لئے ہم میں سے ہر ایک فوج کا سپاہی ہے انہوں نے کہا کہ پاکستان کی دہشت گردی کے خلاف طویل جنگ اور عظیم قربانیاں اس کے پختہ عزم کا مظہر ہیں، پاکستانی قوم نے ہر چیلنج، ہر مشکل اور ہر دشمن کا پامردی اور بے مثال جذبے سے مقابلہ کیا ہے ۔ انہوں نے کہا کہ ہر طرح کی دہشت گردی کی مذمت کرتے ہیں اور بھارت میں پاکستانی قیدی کی جیل میں تشدد سے ہلاکت، کشمیریوں اور بھارت میں رہنے والے مسلمانوں پر حملوں کی مذمت کرتے ہیں، بھارتی حکومت اس لاقانونیت کو روکے اور کشمیریوں اور دیگر مسلمانوں کے جان و مال کا تحفظ یقینی بنایا جائے ،پلوامہ واقعے کے متاثرین کے اہل خانہ کے غم پر افسوس کرتے ہیں۔شہباز شریف کا کہنا تھا کہ بھارتی قیادت سیاست کسی اور معاملے پر کرلے، جنوبی ایشیا کے غریب عوام کا مستقبل تاریک کرنے کی منفی سوچ ترک کرے، ہر الیکشن میں پاکستان دشمنی کا افسوس ناک رجحان بھارتی سیاست میں ختم ہونا چاہیے جب کہ عالمی برادری اور بھارت جتنی جلدی مقبوضہ جموں وکشمیر کے تنازعہ کو حل کرے گی، خون بہنا اتنی ہی جلدی روکنا ممکن ہو سکے گا۔ انہوں نے کہا کہ بھارت نے جموں و کشمیر میں ظلم و بربریت کی جو انتہا کی ہے اس کا ردعمل فطری ہے ،بم، بندوق، گولی اور تشدد سے امن تلاش نہیں ہوسکتا اور نہ ہی مسائل حل ہو سکتے ہیں