جموںوکشمیر انتظامیہ نے جیلوں میں نظر بند قیدیوں کو رہا کرنے شروع کیا

سرینگر30 //مارچ//یو پی آئی // جموںو کشمیر انتظامیہ نے جیلوں میں نظر بند قیدیوں کو رہا کرنے کا سلسلہ شروع کیا ہے اور پچھلے چوبیس گھنٹوں کے دوران پبلک سیفٹی ایکٹ کے تحت نظر بند 31قیدیوں کو رہا کیا گیا ہے۔ خبر رساں ایجنسی یو پی آئی کے مطابق سپریم کورٹ کی ہدایت پر جموںوکشمیر انتظامیہ نے بھی مختلف جیلوں میں نظر بند قیدیوں کو پیرول پر رہا کرنے کا سلسلہ شروع کیا ہے۔ ذرائع نے بتایا کہ جموںوکشمیر انتظامیہ نے 31افراد پر عائد پبلک سیفٹی ایکٹ کو کالعدم قرار دے کر اُنہیں فوری طورپر رہا کرنے کے احکامات صادر کئے ہیں۔ ذرائع کے مطابق کورٹ بلوال جیل سے 11، سرینگر سینٹرل جیل سے 14، راجوری سینٹرل جیل سے 4اور کٹھوعہ سے 2قیدیوں کو رہا کیا گیا ہے۔ ذرائع کا کہنا ہے کہ آنے والے دنوں کے دوران مزید قیدیوں کی رہائی کا امکان ہے اور اس سلسلے میں ہوم ڈپارٹمنٹ نے ایک فہرست بھی ترتیب دی ہیں۔ سرکاری ذرائع کے مطابق جن افراد کے خلاف سخت نوعیت کے کیس درج نہیں ہیں اُنہیں رہا کرنے کا حکم دیا گیا ہے۔ سرکاری ذرائع کا مزید کہنا تھا کہ کورنا وائرس کے پیش نظر پبلک سیفٹی ایکٹ کے تحت نظر بند قیدیوںکو پیرول پر رہا کیا جارہا ہے۔ باوثوق ذرائع نے خبر رساں ایجنسی یو پی آئی کو بتایا کہ جموںوکشمیر میں اس وائرس میں مبتلا افراد کی تعدا دمیں غیر معمولی اضافہ ہونے کے بعد جموںوکشمیر انتظامیہ نے مختلف جیلوں میں نظر قیدیوں کو رہا کرنے کا فیصلہ کیا ہے اور آئندہ کچھ دنوں کے دوران مزید کئی قیدیوں کو رہائی ملنے کا امکان ہے۔