غزہ میں جنگی بندی پر ڈاکٹر فاروق عبداللہ کا اظہارِ اطمینان؛ اقوام متحدہ سے فلسطین کے مسئلے کے حل کیلئے ٹھوس اور کارگر اقدامات کی اپیل

سرینگر/21 مئی: نیشنل کانفرنس کے صدر ڈاکٹر فاروق عبداللہ نے فلسطین میں جنگ بندی پر اطمینان کا اظہار کرتے ہوئے کہا کہ اس سے غزہ میں جاری بے گناہ اور معصوم لوگوں کے وحشیانہ اور بہیمانہ ہلاکتوں اور خونریزی کا سلسلہ تھم جائیگا اور ساتھ ہی اقوام متحدہ پر زور دیا ہے کہ فلسطین کے مسئلے کے حل کیلئے اپنا رول نبھائے۔سی این آئی کے مطابق انہوں نے کہا کہ فلسطین میں جنگی جرائم کے ارتکاب کیلئے اسرائیلی کیخلاف کارروائی ہونی چاہئے اور اس بات کو یقینی بنایا جانا چاہئے کہ مستقبل میں اسرائیل اس قسم کی جارحیت اور دہشت گردی نہ کرے۔ انہوں نے کہا کہ جنگ بندی کے ساتھ ہی یہ معاملہ سرد خانے میں نہیں ڈالا جانا چاہئے بلکہ فلسطین میں بچوں، خواتین، بزرگوں نیز معصوموں کی ہلاکتوں کیلئے اسرائیل سے جواب طلبی ہونی چاہئے اور بین الاقوامی قوانین کے تحت اسے جنگی جرائم کے ارتکاب کیلئے کارروائی ہونی چاہئے ۔ ڈاکٹر فاروق عبداللہ نے اقوام متحدہ سے اپیل کی کہ وہ بیان بازیوں اور زبانی جمع خرچ سے آگے بڑھ کر فلسطین کے مسئلے حل کیلئے ٹھوس اور کارگر اقدامات کرے۔ انہوں نے اسلامی ممالک پر بھی زور دیا کہ وہ یک زبان ہوکر اقوام متحدہ کو فلسطین پر ہورہے مظالم کو روکنے اور اس مسئلے کیلئے پُرامن حل کیلئے دبائو بنائیں۔