پنجاب میں ایک جنگی طیارہ مگ 21حادثے کا شکار ; پائیلٹ ہلاک ، حادثے کی وجوہات کا پتہ لگانے کیلئے کورٹ آف انکوائری کے احکامات

سرینگر/21 مئی: پنجاب میں ایک فوجی جنگی لڑاکا طیارہ مگ21حادثے کا شکار ہوا ہے جس میں سوار ایک پائلٹ ہزاروں فٹ کی اونچائی سے نیچے گر کر شدید زخمی ہوا اور دم توڑ بیٹھا۔ لڑاکا طیارہ گرنے کی وجوہات جاننے کے سلسلے میں کورٹ آف انکوائری کا حکم دیا گیا ہے ۔ادھر پائیلٹ کی نعش کو فوجی اعزاز کے ساتھ اس کے آبائی علاقہ پہنچانے کا بندوبست کیا گیا ہے ۔ کرنٹ نیوز آف انڈیا کے مطابق پنچاب میں انڈین ایئرفورس (آئی اے ایف) کا مگ 21 بیسن لڑاکا طیارہ جمعرات کی دیر رات پنجاب کے ضلع موگا میں حادثہ کا شکار ہوگیا جس میں پائلٹ اسکواڈرن لیڈر ابھینو چودھری کی موت ہوگئی۔یہ طیارہ باقاعدہ تربیتی پرواز پر تھا۔ اس نے پنجاب کے ضلع لدھیانہ کے آئی اے ایف ہلواڑہ ہوائی اڈے سے راجستھان کے سورت گڑھ کے لئے پروازبھری تھی لیکن موگا کے واگھاپورانا سب ڈویڑن کے تحت لانگیانا گاؤں کے قریب تکنیکی خرابی کی وجہ سے حادثہ کا شکار ہوگیا۔ پائلٹ نے طیارہ نیچے گرنے سے پہلے چھلانگ لگائی ، لیکن نیچے پہنچنے پروہ شدید زخمی ہوگیا اور دم توڑ دیا۔ اس سے قبل یہ طیارہ سورت گڑھ سے ہلواڑہ پہنچا تھا۔ حادثہ کی اطلاع ملتے ہی ایئرفورس،فوج اور ضلع انتظامیہ و پولیس کے اعلی افسران موقع پر پہنچ گئے۔ حادثے کی وجوہات کا پتہ لگانے کے لئے آئی اے ایف نے تحقیقات (کورٹ آف انکوائری) کا حکم دیا ہے۔مگ 21 بائیسن طیارہ مگ 21 کی بھی اعلی فورم ہے جو ابھی بھی آئی اے ایف میں خدمات انجام دے رہا ہے۔ تاہم اس کی پرانی شکل مگ۔21 کے زیادہ تر طیارے خدمات سے باہر کئے جا چکے ہیں۔