ہندوستان اور پاکستان کی بدلی سوچ جموں و کشمیر میں امن لائے گی/عمر عبداللہ

سرینگر/04مارچ: ڈی جی ایم او سطح پر بھارت اور پاکستان کے درمیان جنگ بندی معاہدے کا خیرمقدم کرتے ہوئے نیشنل کانفرنس کے نائب صدر عمر عبداللہ نے بدھ کے روز کہا کہ اب دونوں ممالک کی بدلی سوچ جموں و کشمیر میں امن لائے گی۔کرنٹ نیوز آف انڈیا کے مطابق عمر نے پارٹی دفتر میں کارکنوں سے کہا کہ دونوں ممالک کے نئے رویے نے جموں و کشمیر کے بارے میں ایک بدلے ہوئے ذہن کی نشاندہی کی۔ انہوں نے کہا کہ معاہدے سے یہ واضح ہوگیا ہے کہ دونوں ممالک کے نقطہ نظر میں بڑی تبدیلی آئی ہے۔ یہ ایک خوش آئند اقدام ہے اور اسے مثبت انداز میں آگے بڑھانا چاہئے۔ انہوں نے کہا کہ وقتا فوقتا ہم نے دیکھا کہ دونوں ممالک کس طرح ڈی جی ایم او سطح پر کنٹرول لائن ، آئی بی پر تشدد کے خاتمے کے بارے میں بات کرتے ہیں۔ لیکن حالیہ اقدامات بالکل حیران کن ہیں۔عمر نے پارٹی کارکنوں سے کہا کہ موجودہ سیاسی حالات میں ہمیں نچلی سطح پر اپنی پارٹی کو مضبوط بنانے پر زیادہ توجہ دینی ہوگی۔ خواتین کی فعال شرکت کے بغیر پارٹی کو مضبوط بنانے کے خیال پر عمل نہیں کیا جاسکتا۔ انہوں نے کہاڈی ڈی سی انتخابات سے پارٹی کی جڑیں کتنی گہری ہیں اس کا انکشاف ہوتا ہے ، لیکن دوسری طرف مختلف تنظیمی خامیاں بھی سامنے آچکی ہیں ، جن کو کسی بھی حالت میں چھوڑا نہیں جانا چاہئے۔