ہند و پاک کا جنگ بندی معاہدے پر سختی سے عمل کرنے پر اتفاق خوش آئند پیش رفت /ڈاکٹر فاروق

سرینگر/25فروری: ہندوستان اور پاکستان کی طرف سے جنگ بندی معاہدے پر سختی سے عمل کرنے کے فیصلے کا خیر مقدم کرتے ہوئے نیشنل کانفرنس کے صدر ڈاکٹر فاروق عبد اللہ نے اُمید ظاہر کی ہے کہ برصغیر میں امن کو پنپنے کا موقع فراہم کیا جائیگا۔ سی این آئی کے مطابق پارٹی کے صدر ڈاکٹر فاروق عبداللہ (رکن پارلیمان) نے اپنے ایک بیان میں ہندوستان اور پاکستان کی فوجوں کے ڈی جی ایم اوز کی طرف سے جاری مشترکہ بیان، جس میں 2003کے جنگ بندی معاہدے پر سختی سے عمل کرنے کے اتفاق کیا گیا ہے، کا خیر مقدم کرتے ہوئے کہا ہے کہ اُمید ہے کہ دونوں ممالک کی افواج کی طرف سے جاری بیان پر من و عن عمل کیا جائیگا۔اس سے سرحدوں کے قریب قیام پذیر آبادیوں کو اپنی زندگی امن و امان سے جینے کا موقع فراہم ہوگااور وہ بنا کسی خطرے کے اپنی معمول کی زندگی گزار سکتے ہیں۔ انہوں نے کہا کہ نیشنل کانفرنس ہمیشہ ہی سرحدوں پر جنگ بندی کی مضبوط حامی رہی ہے کیونکہ سرحدوں پر جاری گولہ باری سے معصوم اور بے گناہ لوگوں کی زندگی اجیرن بن کر رہ گئی ہے اور بے شمار کنبے ایسے بھی ہیں جو اس وقت بھی ہجرت کرکے اپنے گھروں دور سے ہیں۔ ڈاکٹر فاروق عبداللہ نے دونوں ممالک سے اپیل کی کہ وہ بات چیت کو جنگ بندی معاہدے تک ہی محدود نہ رکھیں بلکہ مسئلہ کشمیر سمیت تمام حل طلب معاملات کیلئے مذاکرات کی میز پر آئیں اور مل بیٹھ کر پُرامن طریقے سے مسائل کا حل تلاش کریں۔ انہوں نے کہا کہ بات چیت ہی آگے بڑھنے کا واحد پُرامن راستہ ہے اور دونوں ممالک کو اسی سمت میں آگے بڑھنے کی ضرورت ہے۔