اوڑی میںکنٹرو ل لائن پر دراندازی کی کوشش بی ایس ایف نے بنائی ناکام؛ مقامی درانداز ہلاک ، سرفراز میر کئی بار دراندازی کی وارداتوں میں ملوث تھا/ پولیس

سرینگر/10فروری: سانبہ کے بعد سرحدی ضلع قصبہ اوڑی میں لائن آف کنٹرول پر بی ایس ایف نے دراندازی کی کوشش کو ناکام بنا کر ایک درانداز کو ہلاک کرنے کا دعویٰ کیا ہے ۔ پولیس نے اس کی تصدیق کرتے ہوئے بتایا کہ ہلاک شدہ درانداز کی شناخت اوڑی کے باشند کے بطور ہوئی جو کئی بار دراندازی کرکے پاکستان چلا گیا تھا ۔ سی این آئی کے مطابق لائن آف کنٹرول پر اوڑی کے دلنجا گائوں میں دراندازی کی کوشش کی اطلاع ملنے کے بعد منگل اور بدھ کی درمیانی رات کو بی ایس ایف نے علاقے میں آپریشن عمل میں لایا جس دوران بی ایس ایف نے دعویٰ کیا تھا کہ انہوں نے پاکستان سے تعلق رکھنے والے ایک درنداز کو ہلاک کیا ہے۔ ذرائع سے معلوم ہوا ہے کہ ہلاک شدہ درنداز کا نام سرفراز میر ہے اور وہ اوڑی کا ہی باشندہ ہے۔ سرفراز میر کئی بار دراندازی کی وارداتوں میں ملوث تھا اور سنہ 1992 میں اس نے سرحد پار کرکے کشمیر میں عسکری کاروائیوں کو انجام دیا۔ بعدازاں 1995 میں میر نے خودسپردگی کی اور 2005 میں پھر ایک بار سرحد عبور کرکے پاکستان چلا گیا۔پولیس کے ایک سنیئر آفیسر نے اس کی تصدیق کرتے ہوئے بتایا کہ مذکورہ درانداز مسلسل سرحد پار کرکے پاکستان چلا جاتا تھا جہاں سے وہ اسلحہ کشمیر پہنچاتا تھا ، انہوں نے بتایا کہ درانداز کی لاش کو اسلحہ کے ساتھ دیکھا گیا ہے۔اس سلسلہ میں پولیس نے ایک کیس درج کر کے تحقیقات شروع کر دی ہے۔واضح رہے گزشتہ روز بھی بھارتی سرحدی فورس نے دعویٰ کیا تھا کہ انہوں نے پاکستان سے تعلق رکھنے والے ایک درنداز کو ہلاک کیا ہے۔سرحدی حفاظتی فورس یعنی بی ایس ایف نے چک فکیرا، سانبہ سیکٹر میں ایک پاکستانی درنداز کو ہلاک کیا تھا جو بھارتی حدود میں داخل ہونے کی کوشش کر رہا تھا ۔