راجوری کے سندر بنی سیکٹر میں ہند پاک افواج کے مابین شلنگ ، فوجی اہلکار ہلاک

سرینگر/04 فروری/سی این آئی// سرحدوں پر بڑھتی کشیدگی کے بیچ ہند پاک افواج نے ایک مرتبہ پھر راجوری میں ایک دوسرے کے ٹھکانوں کو گولیوں اور مارٹروں سے نشانہ بنایا۔جس کے نتیجے میں دونوں جانب سرحدی علاقوں میں خوف و دہشت کا ماحول پھیل گیا ہے ۔ہند پاک افواج کے مابین ہوئی کراس فائرنگ کے نتیجے میں ایک فوجی اہلکار ہلاک ہوگیا۔سی این آئی کے مطابق پاکستان نے جموں و کشمیر کیضلع راجوری میں سرحد پر جنگ بندی کی خلاف ورزی کی ہے ۔ دفاعی ذرائع کے مطابق راجوری میں ہندوستان اور پاکستان کی افواج کے مابین ہوئی کراس فائرنگ کے نتیجے میں ایک فوجی اہلکار ہلاک ہوگیا۔دفاعی ترجمان کا حوالہ دیتے ہوئے بتایا گیا ہے کہ مہلوک فوجی اہلکار کی شناخت سپاہی لکشمن ساکن جودھپور راجستھان کے طور ہوئی ہے۔یہ واقعہ راجوری کے سندربنی سیکٹر میں پیش آیا جہاں دفاعی ترجمان کے مطابق پاکستان نے جنگ بندی معاہدے کی خلاف ورزی کی جس کا ہندوستانی افواج نے "بھر پور ” جواب دیا۔لکشمن کی ہلاکت اس سال ایسے ہی پیش آئے واقعات میں ہونے والی چوتھی ہلاکت ہے۔اس سے رواں برس اب تک قبل لائن آف کنٹرول پر پاکستانی فائرنگ میں تین فوجی اہلکار ہلاک ہوگئے تھے۔۔ ذرائع نے کہا کہ طرفین نے ایک دوسرے کیخلاف ہلکے اور بھاری ہتھیاروں کا استعمال کیا گیا۔ا دھر بھارتی فوجی ذرائع نے پاکستانی فوج پر الزام عائد کیا ہے کہ پاکستانی فوج نے جنگ بندی معاہدے کی خلاف ورزی کرتے ہوئے بلااشتعال فائرنگ کی ۔ واضح رہے کہ ہندوستان اور پاکستانی فوج کے مابین 2003میں جنگ بندی معاہدہ طے پایا گیا تھا جس کے تحت دونوں ممالک نے اس بات پر رضامندی ظاہر کی تھی کہ سرحدوں پر امن و امان قائم کرنے کیلئے دونوں جانب گولیوں کا تبادلہ بند کیاجائے گا ۔ جنگ بندی معاہدے کی خلاف ورزی کاسلسلہ اُس وقت پھر شروع ہوا جب ممبئی کے تاج ہوٹل پر حملہ ہوا تھا اور بھارت نے پاکستان پر الزام عائد کیا تھا کہ یہ حملہ پاکستان کی شہہ پر کیا گیا تھا تاہم پاکستان نے اس الزام کو مسترد کیا ۔ تب سے آج تک وقفے وقفے سے سرحدوں پر دونوں جانب گولہ باری کا سلسلہ جاری ہے جس میں آج تک سینکڑوں افراد دونوں جانب جاں بحق ہوئے ہیں ۔