بھاری برفباری کے بعد چلہ کلان کے تیور مزید سخت ، اہلیان وادی کو مشکلات

سرینگر میں بھی شبانہ درجہ حرارت میںمزید کمی ، گلمرگ منفی 11.2ڈگری پر منجمند

سرینگر/12جنوری: بھاری برفباری کے بعد چلہ کلان کے سخت تیور کے بیچ سردی کی لہر نے وادی کو اپنی لپیٹ میں لے لیا جبکہ سرینگر میں مسلسل درجہ حرارت نقطہ انجماد سے نیچے گر کر منفی0.9ڈگری ریکارڈ کیا جبکہ شہر آفا ق گلمرگ میں شبانہ درجہ حرارت منفی 12تک پہنچ گیا ۔ ادھر محکمہ موسمیات نے اگلے ایک ہفتے تک موسمی صورتحال مجموعی طور پر بہتر رہنے کی پیشگوئی کرتے ہوئے بتایا کہ موسمی صورتحال میں 20جنوری کے بعد ہی تبدیلی آسکتی ہے ۔ سی این آئی کے مطابق شدید سردی کی لہر نے وادی کو اپنی لپیٹ میں لے لیا ہے اور اس دوران صبح و شام یخ بستہ ہواؤں کی وجہ سے عام زندگی معطل ہو کر رہ گئی ہے۔اگرچہ رات بھر آسمان کھلا رہتا ہے تاہم اس دوران کھلے آسمان کی وجہ سے سردی میں بے پناہ اضافہ ہو رہا ہے جبکہ رات کے وقت ہڑیوں کو گلا دینے والی اس سردی کی وجہ سے بیشتر لوگ گھروں سے باہر نہیں آتے۔دن بھر اگر چہ کبھی کبھی فضاء میں سورج بھی جلوا ہ افروز ہوتا تاہم اس دوران بھی سرد ہواؤں کی لہر سورج کی تمازت کو کھا جاتی ہے۔شہر سرینگر سمیت وادی کے جنوب و شمال میں سردیو ں کی وجہ سے صبح دیر سے دن شروع ہوتا ہے اور شام کو جلد ہی رات ہونے کی وجہ سے اوقات کار میں بھی کمی آئی ہے۔ موسم سرماکی آمد کے ساتھ ہی وادی میں عام زندگی اگر چہ متاثر ہوتی ہے تاہم سخت ترین سردیوں اور یخ بستہ ہواؤں کی وجہ سے اس میں اضافہ ہوتا ہے۔ دریں اثناء سرینگر سمیت وادی کے بیشتر علاقوں میں درجہ حرارت بھی نقطہ انجماد سے مسلسل نیچے گر گیا اورمنگل اور سوموار کی شب بھی سرد ترین رات کے طور پر ریکارڈ کی گئی۔ سرینگر میں بھی درجہ حرارت کے گرنے کی وجہ سے موسم سرد رات کو ریکارڈ کیا گیا جبکہ مجموعی طور پر منفی 0.9ڈگری سلشس درجہ حرارت ریکارڈ کیا گیا۔جبکہ گذشتہ رات کے دوران گلمرگ میں کم سے کم درجہ حرارت منفی11.2ڈگری سیلشیس جبکہ سرینگر میں منفی0.2ڈگری سیلشیس ریکارڈ کیا گیا۔محکمہ موسمیات نے منگل کو بتایا کہ پہلگام میں کم سے کم درجہ حرارت منفی5.3ڈگری سیلشیس تک گر گیا۔ادھر معلوم ہوا ہے کہ وادی کے دیگر علاقوں میں بھی سرد لہر جاری ہے۔خطہ لداخ کا لیہہ بدستور ریاست کی سرد ترین جگہ بنی ہوئی ہے،ادھر صبح پینے کے پانی کے نل منجمند پائے گئے۔ کچھ ایک آبی ذخائر کو بھی جزوی طور پر منجمند پایا گیا۔ تاہم سری نگر سمیت وادی کے تمام علاقوں میں دوپہر ایک بجے سے اچھی خاصی دھوپ کھلی رہی۔ اسی دوران محکمہ موسمیات کے ایک ترجمان نے بتایا کہ جموں کشمیر میں اگلے چوبیس گھنٹوں کے دوران موسم میں تبدیلی کا کوئی امکان نہیں ہے اور مجموعی طور پر موسم ایک ہفتے تک خشک رہنے کا امکان ہے ۔