ایک دن کی معطلی کے بعد سرینگر جموں شاہراہ پرٹریفک کی نقل و حمل دوبارہ بحال

سرینگر/05دسمبر: سرینگر جموں شاہراہ پر ضروری مرمت کے پیش نظر جمعہ کو ٹریفک کی نقل و حمل معطل رہنے کے بعد سنیچروار کی صبح گاڑیوں کی آمد رفت دوبارہ بحال کر دی گئی تاہم تازہ برفباری کے باعث سرینگر لہہ شاہراہ اور مغل روڑ سمیت دیگر کئی رابطہ سڑکیں ٹریفک کی آمد رفت کیلئے بند رہی ۔ سی این آئی کو نمائندے نے قاضی گنڈ سے اس ضمن میں تفصیلات فراہم کرتے ہوئے بتایا کہ جمعہ کے روز سرینگر جموں شاہراہ پر ضروری مرمت کے پیش نظر ٹریفک کی نقل و حمل بند رہی تاہم سنیچروار کی صبح شاہرا ہ پر ٹریفک کو دوبارہ بحال کر دیا گیا اور یک طرفہ ٹریفک کی نقل و حمل کے مطابق گاڑیوں کو سرینگر سے جموں کی جانب جانے کی اجازت دی گئی ۔ ادھر محکمہ ٹریفک کے مطابق آج یعنی اتوار کو موسمی صورتحال ساز گار رہنے کی صورت میں گاڑیوں کو جموں سے سرینگر کی طرف آنے کی اجازت ہو گی ۔ محکمہ ٹریفک کے مطابق کووڈ 19کے رہنمائے خطوط پر مکمل عملد ر آمد کے علاوہ مسافروںکے جان و مال کی حفاظت اور سڑک کی حالت کو دیکھ کر مخالف سمت سے کسی بھی گاڑی کو چلنے کی اجازت نہیں ہو گی ۔ ادھر تازہ برفباری کے بعد تاریخی مغل روڑ پر دوسرے دن بھی ٹریفک کی نقل و حمل بند رہی جبکہ دراس، منی مرگ، سونہ مرگ اور زوجیلا میں تازہ برفباری کے بعد 434کلو میٹر سرینگر۔لیہ شاہراہ کو ہفتے کے روز احتیاطی طور پر آمدورفت کے لئے بند کردیا گیا۔ ذرائع نے بتایا کہ صبح سے ہی شاہراہ کے دونوں طرف پروجیکٹ وجیک اور باڈر روڈ آرگنائزیشن نے شاہراہ سے برف ہٹانے کا کام شروع کیا ہے۔ ادھر دیگر کئی اہم رابطہ سڑکیں بھی تازہ برفباری کے باعث بند پڑی ہوئی ہے جس کے نتیجے میںکئی علاقوں کا رابطہ منقطع ہو چکا ہے ۔