دن بھر دھوپ نکلنے کے باعث درجہ حرارت میں کافی کمی ، پوری وادی شدید سردی کی لپیٹ

سرینگر/28نومبر: وادی کشمیر میں شبانہ درجہ حرارت میں نمایاں گراوٹ ریکارڈ کرنے سے پوری وادی شدید سردی کی لپیٹ میں ہیں۔ اس دوران خطہ لداخ کے قصبہ کرگل میں گزشتہ رات رواں موسم کی اب تک کی سرد ترین رات ثابت ہوئی ہے جس دوران یہاں کم از کم درجہ حرارت منفی 12.9ریکارڈ کیا گیا ۔۔اس دوران محکمہ موسمیات نے پیشنگوئی کی ہے کہ آئندہ کچھ دنوں تک وادی کشمیر میں موسم خشک رہنے کا امکان ہے تاہم اس عرصے کے دوران مطلع ابروآلود رہنے کا بھی امکان ہے۔سی این آئی کے مطابق وادی کشمیر میں جاری شدید سردی کی لہر کے بیچ خطہ لداخ کے قصبہ کرگل میں گزشتہ رات رواں موسم کی اب تک کی سرد ترین رات ریکارڈ کی گئی جس کے دوران یہاں کم از کم درجہ حرارت نقطہ انجمادسے کئی ڈگری نیچے ریکارڈ کیا گیا ۔ اگر چہ خطہ لداخ کے قصبہ لہہ میں رات کے درجہ حرارت میں گزشتہ رات معمولی بہتری ریکارڈ کی گئی تاہم یہ پھر بھی ریاست میں سرد ترین جگہ بنی ہوئی ہے ۔محکمہ موسمیات کے ترجمان کے مطابق کشمیر جموں اور لداخ خطوں میں آئندہ 24گھنٹوں کے دوران موسم خشک رہنے کا امکان ہے تاہم اس عرصے کے دوران مطلع ابر و آلود رہ سکتا ہے۔ انہوں نے کہا وادی میں اگلے پانچ روز کے دوران موسم مجموعی طور پر خشک رہنے کی توقع ہے۔محکمہ کے مطابق سرینگر میں کم سے کم درجہ حرارت منفی2.2ڈگری سیلشیس،پہلگام میں منفی5.2اور گلمرگ میں منفی5.6 ڈگری سیلشیس ریکارڈ کیا گیا۔محکمہ نے مزید کہا کہ کرگل میں کم سے کم درجہ حرارت منفی9.2ڈگری سیلشیس تک گر گیا ہے۔محکمہ موسمیات کے ترجمان کے مطابق سیاحتی مقام گلمرگ میں رات کے درجہ حرارت میں کافی بہتری ریکارڈ کی گئی ۔جبکہ صحت افزاء مقام پہلگام میں بھی رات کے درجہ حرارت میں کافی بہتری ریکارڈ کی گئی ۔سرینگر میں اگر چہ صبح لوگوں نے کھلی دھوپ کا نظارہ کیا تاہم یخ بستہ ہوائوں کے نتیجے میں یہاں کا موسم بھی سرد ہی محسوس کیا جارہا ہے۔سرینگر میں بھی رات کے درجہ حرارت میں ہلکی گراوٹ ریکارڈ کی گئی ہے ۔ ادھر وادی کشمیر میں سردیوں کے ایام کے دوران بجلی کی عدم دستیابی کے نتیجے میں لوگ مشکلات سے دو چار ہے جبکہ سردی سے بچنے کیلئے اہلیان کشمیر نے گرم ملبوسات زیر تن کرنا شروع کر دیا ہے اور سردی سے بچنے کیلئے روایتی اور جدید گرمی کے آلات کا استعمال کرنا بھی شروع کر دیا ہے۔