آئندہ ایک ہفتے تک موسم مجموعی طور پر خشک رہے گا ، 24نومبر سے پھر تبدیلی کا امکان / محکمہ موسمیات

موسم میں آئی بہتری ،سورج بادلوں سے باہر نکل آیا ، لوگوں نے لی راحت کی سانس

سرینگر/16نومبر: پیر پنچال کے آر پار تیسرے روز بھی بالائی علاقوں میں شبانہ برفباری اور میدانی علاقوں میں بارشوں کے بعد موسمی صورتحال میں بہتری آئی جس کے نتیجے میں لوگوں نے راحت کی سانس لی ۔ ادھر سوموار کے بعد دوپہر سورج بادل سے باہر آیا اور ہلکی دھوپ بھی نکل آئی ۔ اسی دوران محکمہ موسمیات نے آئندہ ایک ہفتے تک موسمی صورتحال خوشگوار رہنے کی پیشگوئی کرتے ہوئے 24نومبر سے مزید بارشوں اور برفباری کی پیشگوئی کی ہے ۔ سی این آئی کے مطابق تین روز تک خراب موسمی صورتحال کے بعد سوموار کو موسم بہتر ہوا اور بادلوں سے سورج کی کرنیں نکل آئی ۔ سوموار اور اتوار کی درمیانی رات کو گلمرگ ، سونہ مرگ ، بانہال ، جواہر ٹنل اور دیگر بالائی علاقوں میں جم کر برفباری ہوئی ۔جبکہ شہر سرینگر سمیت وادی کے دیگر علاقوں میں ہلکی سے درمیانی درجے کی بارشیں ہوئی ۔ پہاڑی علاقوں میں برف باری اور میدانی علاقوں میں بارشوں کے بعد سوموار کی صبح سے ہی موسم میں بتدریج بہتری آنے کا سلسلہ شروع ہوئی اور دن میں کئی بار آفتاب بھی گہرے بادلوں کی اوٹ سے باہر نکلنے میں کامیاب ہوا۔موسم میں بہتری آنے کے ساتھ ہی دن بھر ہلکی دھوپ بھی کھل اٹھی جس کے نتیجے میںسردی کی لہر میں بھی کمی آئی اور لوگوں نے راحت کی سانس لی ۔ ادھر شہر آفاق گلمرگ میںتازہ برفباری اور سرحدی ضلع کپواڑہ میںمسلسل بارشوں کے نتیجے میں دنوں مقامات پر شبانہ درجہ میں کافی تنزلی دیکھنے کو ملی اور رات کا درجہ حرارت منفی میں ریکارڈ کیا گیا ۔ محکمہ موسمیات کے مطابق شہر سرینگر میں گزشتہ 24گھنٹوں میں 3.7 ملی میٹر بارش ریکارڈ کی گئی جبکہ رات کا کم سے کم درجہ حرارت 2.8 ڈگری سینٹی گریڈ ریکارڈ کیا ۔ ادھر سرینگر میں مقیم محکمہ موسمیات کے صوبائی ناظم سونم لوٹس نے بتایا کہ وادی کشمیر میں اگلے ایک ہفتے تک موسم مجموعی طور پر خشک ہی رہے گا۔تاہم ان کا کہنا تھا کہ اس دوران پہاڑی علاقوں میں کہیں کہیں ہلکی سے درمیانی درجے کی بارشیں یا برف باری متوقع ہے۔محکمہ موسمیات کے مطابق 24نومبر کے بعد وادی کشمیر میں پھر سے موسمی صورتحال آنے کا امکان ہے اور برفباری اور بارشوں ہو سکتی ہے ۔ قابل ذکر ہے کہ پیر پنچال کے آر پار مسلسل تین دنوں تک خراب موسمی صورتحال ریکارڈ کی گئی جس دوران بالائی علاقوں میں برفباری اور میدانی علاقوں میں بارشوں ہوئی۔ یہ بات قابل امر ہے کہ محکمہ موسمیات نے پہلے ہی وادی کشمیر میں تین دنوں تک موسمی صورتحال خراب رہنے کی پیشگوئی کرتے ہوئے بتایا تھا کہ 16نومبر سے موسمی صورتحال میں بہتری آئی گی ۔