جموں وکشمیر این آئی اے کی چھاپہ ماری؛ آزادی اظہارکو دبانے کی کوشش/ محبوبہ مفتی

سرینگر /28اکتوبر / کے پی ایس : پی ڈی پی صدر اور سابق وزیر اعلیٰ محبوبہ مفتی نے قومی تحقیقاتی ایجنسی (این آئی اے) کی طرف سے معروف حقوق انسانی کارکن خرم پرویز اور روزنامہ گریٹرکشمیر کے دفتر پر چھاپوں کی مذمت کرتے ہوئے کہا ہے کہ این آئی اے بی جے پی کی ‘پالتو ایجنسی’ بن کر اختلاف رائے رکھنے والوں کو ڈرا دھمکا رہی ہے۔انہوں نے اپنے ایک ٹوئٹ میں کہاکہ حقوق انسانی کارکن خرم پرویز اور گریٹر کشمیر کے دفتر پر این آئی اے کے چھاپے حکومت ہند کی طرف سے آزادی اظہار و اختلاف رائے کا گلا دبانے کی ایک اور مثال ہے۔انہوں نے کہا کہ این آئی اے بی جے پی کی پالتو ایجنسی بن کر ہاں میں ہاں نہیں ملاتے ہیں ۔انہوں نے کہاہے کہ ایسے وقت میں جب جموں و کشمیر میں زمین اور دیگر وسائل کو لوٹا جار ہا ہے، حکومت ہند میڈیا سے ذیباطیس اور یوگا پر ادارے تحریر کرواناچاہتی ہے۔ انہوں نے کہا کہ بی جے پی کے "سب کچھ ٹھیک” کے نعرے کے تحت سچائی سب سے زیادہ نشانہ بنی ہوئی ہے۔ جو صحافی "گودی میڈیا” کا حصہ نہیں بننا چاہتا ہے، اس کو ٹارگیٹ کیا جا رہا ہے ۔واضح رہے کہ این آئی اے نے بدھ کے روز سرینگر میں معروف حقوق انسانی کارکن خرم پرویزکی سونہ وارعلاقے میں واقع رہائش گاہ اور انگریزی روزنامے گریٹر کشمیر کے سرینگرکی پریس کالونی میں واقع دفترکے علاوہ چند صحافیوں کی رہائش گاہوں اور کم از کم تین غیر سرکاری تنظیموں کے دفاتر پر بھی چھاپہ ماری کی۔