چین ایک مشن کے تحت سرحدی تنازع پیدا کررہا ہے/ راج ناتھ سنگھ

سرینگر /12اکتوبر: وزیر دفاع راجناتھ سنگھ نے چین پر الزام عائد کیا ہے کہ چین پاکستان کی طرح ہی سرحدی کشیدگی بڑھانا چاہتا ہے تاکہ بین الاقوامی سطح پر اس طرف توجہ مرکوز کی جائے ۔ کرنٹ نیوز آف انڈیا کے مطابق پاکستان کے بعد چین پر الزام عائد کرتے ہوئے وزیر دفاع راجناتھ سنگھ نے کہا ہے کہ پاکستان کی طرح ہی اب چین بین الاقوامی توجہ کیلئے سرحدی کشیدگی بڑھارہا ہے ۔ انہوںنے کہا کہ بھارت اب دفاعی لحاظ سے کافی مضبوط ہے اور اب ہمارے پڑوسی ممالک کو یہ بات سمجھ آچکی ہے ۔ وزیر دفاع راج ناتھ سنگھ نے پیر کو کہا کہ پاکستان کے بعد اب چین بھی سرحد پر ایک مشن کے تحت تنازع پیدا کررہا ہے ، لیکن ملک اس بحران کا سامنا پورے استقامت کے ساتھ کررہا ہے۔ سنگھ نے پیر کو ویڈیو کانفرنسنگ کے ذریعے بارڈر روڈ آرگنائزیشن (بی آر او) کے ذریعہ سات ریاستوں اور مرکزکے زیر کنٹرول علاقوں میں تعمیر کیے گئے 44 پلوں کا افتتاح کیا اور اروناچل پردیش میں نیچیفو سرنگ کے کام کا سنگ بنیاد رکھا۔اس موقع پرانہوں نے کہا کہ کووڈ 19 کی وجہ سے ہرشعبہ میں ملک کو پیدا ہونے والے بہت سے مسائل کا سامنا ہے۔