ایمز دہلی میں والد کے انتقال کے بعد انجینئر رشید کو نماز جنازہ میں شرکت کیلئے ضمانت مل گئی

بارہمولہ کے ممبر پارلیمنٹ انجینئر رشید کو اپنے والد حاجی خضر محمد کی آخری رسومات میں شرکت کیلئے ضمانت دی گئی، جن کا مختصر علالت کے بعد ایمز دہلی میں انتقال ہوگیا۔

اہل خانہ نے بتایا کہ انجینئر رشید کو نئی دہلی میں ان کے والد کے انتقال کے بعد آخری رسومات میں شرکت کی اجازت دی گئی ہے۔ رشید کی 2 جون تک ضمانت منظور کر لی گئی ہے۔

قابل ذکر بات یہ ہے کہ رشید کو اس سے قبل 28 اپریل کو اپنے بیمار والد سے ملنے کے لیے عبوری ضمانت دی گئی تھی۔ اپنے خاندان کے ساتھ کچھ دن گزارنے کے بعد وہ 6 مئی کو تہاڑ جیل واپس آئے۔

خاندانی ذرائع نے بتایا کہ خضر محمد شیخ کی آخری رسومات شمالی کشمیر کے لنگیٹ میں ان کے آبائی مقام پر ادا کی جائیں گی۔