امیت شاہ نے جموں کشمیر کی سیکورٹی صورتحال کا لیا جائزہ ، کہا حکومت دیرپا امن قائم کرنے کیلئے پرعزم

مرکزی وزیر داخلہ امیت شاہ نے نئی دہلی میں جموں و کشمیر پر ایک سیکورٹی جائزہ میٹنگ کی صدارت کی۔

جموں و کشمیر کے لیفٹنٹ گورنر منوج سنہا، مرکزی داخلہ سیکرٹری ڈائریکٹر (آئی بی)، جموں و کشمیر کے چیف سیکرٹری اور ڈائریکٹر جنرل پولیس، سی اے پی ایف کے سربراہان اور دیگر سینئر افسران میٹنگ میں موجود تھے۔اس موقعہ پر وزیر داخلہ شاہ نے کہا کہ وزیر اعظم نریندر مودی کی قیادت میں حکومت ہند جموں و کشمیر میں دیرپا امن قائم کرنے اور دہشت گردی کو مکمل طور پر ختم کرنے کے لیے پرعزم ہے۔

دہشت گردی کے خلاف زیرو ٹالرینس کی پالیسی کو دہراتے ہوئے جناب شاہ نے کہا کہ مودی حکومت کی مسلسل اور مربوط کوششوں کی وجہ سے جموں و کشمیر میں دہشت گردی کا ماحولیاتی نظام درہم برہم ہوگیا ہے۔امیت شاہ نے جموں و کشمیر کے سیکورٹی کے منظر نامے کو مضبوط بنانے کے لیے سیکورٹی ایجنسیوں کی کوششوں کی تعریف کی۔

انہوں نے کہا کہ دہشت گردی کے بنیادی ڈھانچے کو نشانہ بنانے والے انسداد دہشت گردی آپریشنز کو مشن موڈ میں جاری رکھا جانا چاہیے۔

وزیر داخلہ نے تمام سیکورٹی ایجنسیوں کو ہدایت دی کہ وہ چوکس رہیں اور ہم آہنگی کے ساتھ کام کرتے رہیں تاکہ یہ یقینی بنایا جا سکے کہ دفعہ 370 کی منسوخی کے بعد حاصل ہونے والی کامیابیاں برقرار رہیں اور ہم ‘دہشت گردی سے پاک جموں و کشمیر’ کے ہدف کو جلد سے جلد حاصل کریں۔ انہوں نے یقین دلایا کہ اس کوشش میں تمام وسائل دستیاب کرائے جائیں گے۔