سرینگر /14اگست /
اینٹی کورپشن بیورو نے شوپیان میں محکمہ دیہی ترقی کے جونیئر اسسٹنٹ عامر فاروق شیخ کو رشوت لیتے ہوئے گرفتار کر لیا ۔اے سی بی ترجمان نے کہا کہ جموں و کشمیر اینٹی کرپشن بیورو کو ایک تحریری شکایت موصول ہوئی ہے جس میں الزام لگایا گیا ہے کہ شکایت کنندہ کے ذریعہ کئے گئے کاموں سے متعلق 7.5 لاکھ روپے کی ادائیگی محکمہ دیہی ترقیات، شوپیاں کے پاس زیر التوا ہے۔
ملزم جے ای نے مذکورہ ادائیگی کی رہائی میں سہولت فراہم کرنے کے لیے مبینہ طور پر 20,000 روپے کا مطالبہ کیا۔انہوں نے کہا کہ شکایت کنندہ، رشوت دینے کے لیے تیار نہیں، قانونی کارروائی کرنے کے لیے اے سی بی سے رجوع ہوا۔ محتاط تصدیق کے بعد، بدعنوانی کی روک تھام ایکٹ، 1988 کی دفعہ 7 کے تحت ایف آئی آر نمبر04/2025پولیس اسٹیشن اے سی بی اننت ناگ میں درج کیا گیا، اور تحقیقات شروع کی گئی۔
تفتیش کو آگے بڑھانے کیلئے آزاد گواہوں کے ساتھ ایک ٹریپ ٹیم تشکیل دی گئی، اس میں مزید کہا گیا ہے کہ کارروائی کے دوران ملزم جے ای کو 20 ہزار روپے رشوت کی رقم کا مطالبہ اور قبول کرتے ہوئے رنگے ہاتھوں پکڑا گیا، جو گواہوں کی موجودگی میں اس کے قبضے سے برآمد ہوئی۔ اسے موقع پر گرفتار کر لیا گیا۔
بیان میں کہا گیا کہ ایف آئی آر کے اندراج کے فوراً بعد، کچڈورہ، شوپیاں، اور کنی پورہ، نوگام، سری نگر میں اس کے رہائشی احاطے کی تلاشی لی گئی۔ یہ رپورٹ درج کرنے کے وقت تلاشیاں جاری تھیں۔
Comments are closed.