سری نگر،15مئی
جنوبی کشمیر کے ضلع پلوامہ کے ترال علاقے کے نادر گاؤں میں جمعرات کی علی الصبح سیکورٹی فورسز اور ملی ٹینٹوں کے درمیان ہونے والے شدید تصادم میں تین ملی ٹینٹ ہلاک ہو گئے ہیں۔ پولیس کے مطابق مارے گئے ملی ٹینٹوں کی شناخت اور ان کی تنظیمی وابستگی کے لئے جانچ پڑتال شروع کی گئی ہے۔
پولیس ذرائع نے بتایا کہ ترال کے نادر علاقے میں ملی ٹینٹوں کی موجودگی سے متعلق ایک خفیہ اطلاع موصول ہونے کے بعد فوج، جموں و کشمیر پولیس اور سی آر پی ایف کی مشترکہ ٹیم نے جمعرات کی علی الصبح علاقے کو محاصرے میں لے کر تلاشی مہم شروع کی۔
تلاشی کارروائی کے دوران فورسز کے اہلکار جب مشتبہ مقام کے قریب پہنچے تو وہاں چھپے ملی ٹینٹوں نے اچانک فائرنگ شروع کر دی، جس کے جواب میں فورسز نے بھی مؤثر جوابی کارروائی کی۔ دونوں جانب سے کافی دیر تک شدید گولیوں کا تبادلہ جاری رہا، جس کے دوران تین ملی ٹینٹ مارے گئے۔
انسپکٹر جنرل آف پولیس (آئی جی پی) کشمیر وی کے بردی نے میڈیا نمائندوں سے بات چیت کے دوران اس تصادم کی تصدیق کرتے ہوئے کہا کہ:’ترال کے نادر علاقے میں صبح کے وقت لانچ کیے گئے ایک تلاشی آپریشن کے دوران ملی ٹینٹوں کی جانب سے فائرنگ کی گئی، جس کے جواب میں فورسز نے بھی فائرنگ کی اور تین دہشت گردوں کو مار گرایا گیا۔‘
انہوں نے مزید کہا کہ تصادم کے مقام سے ملی ٹینٹوں کی لاشیں برآمد کی گئی ہیں، تاہم ابھی ان کی شناخت اور تنظیمی وابستگی کی جانچ کی جا رہی ہے۔ علاقے میں تلاشی مہم بدستور جاری ہے تاکہ یہ تصدیق ہو سکے کہ آیا وہاں مزید کوئی ملی ٹینٹ چھپا ہوا ہے یا نہیں۔
آئی جی کشمیر نے بتایا کہ جنوبی کشمیر میں ملی ٹنسی کے خلاف جاری آپریشنوں میں تیزی لائی گئی ہے، اور پچھلے 48 گھنٹوں کے دوران چھ دہشت گرد مارے گئے ہیں۔ انہوں نے کہا کہ سیکیورٹی فورسز ریاست میں امن و امان برقرار رکھنے کے لیے پوری طرح مستعد ہیں اور کسی بھی تخریبی سرگرمی کو کامیاب نہیں ہونے دیا جائے گا۔
Comments are closed.