کولگام واقعہ: پولیس سربراہ نے اعلیٰ سطحی تحقیقات کا یقین دلایا :رویندر رینا

سری نگر،19مارچ

بی جے پی کے سینئر لیڈر رویندر رینا نے بدھ کے روز کہاکہ کولگام میں لاپتہ ہوئے دو نوجوانوں کی لاشیں برآمد ہونے کے معاملے کا پولیس نے سخت نوٹس لیا ہے۔

انہوں نے کہاکہ پولیس سربراہ نالین پربھات نے یقین دلایا ہے کہ معاملے کی اعلیٰ سطحی تحقیقات ہوگی ۔

اطلاعات کے مطابق بی جے پی کے سینئر لیڈر رویندر رینا بدھ کے روز قاضی گنڈ کے باغ مدینہ گاوں پہنچے اور وہاں پر متاثرین کے ساتھ ملاقات کی ۔نامہ نگاروں سے بات چیت کے دوران رویندر رینا نے کہاکہ قاضی گنڈ میں افسوسناک واقع پیش آیا ہے اوراس کی جتنی بھی مذمت کی جائے کم ہے۔

انہوں نے کہاکہ ایک ماہ قبل گوجر بکروال قبیلے سے تعلق رکھنے والے تین نوجوان لاپتہ ہوئے جن میں سے بعد میں شوکت بجاڑ اور ریاض احمد کی نعشیں برآمد کی گئیں جبکہ مختیار احمد ہنوز لاپتہ ہے۔

رویندر رینا نے کہا :’ ہم پوری کوشش کریں گے کہ متاثرہ خاندان کو انصاف ملے ۔ ‘
انہوں نے مزید بتایا کہ تحقیقات کے بعد اگر سازش پائی گئی تو ملوثین کے خلاف سخت سے سخت کارروائی عمل میں لائی جائے گی۔
ان کا مزید کہنا تھا کہ پولیس چیف نالین پربھات کے ساتھ فون پر بات ہوئی اور انہوں نے بھی یقین دہانی کرائی کہ معاملے کی اعلیٰ سطحی تحقیقات ہوگی اور قصورواروں کو قانون کے کٹہرے میں کھڑا کیا جائے گا۔