گلمرگ میں کھیلو انڈیا گیمز شیڈول کے مطابق آگے بڑھیں گے۔ صوبائی کمشنر کشمیر

انتظامیہ آئندہ موسم سرما اور اہم تقریبات کیلئے بروقت اور موثر تیاریوں کو یقینی بنانے کیلئے پرعزم ہے کی بات کرتے ہوئے صوبائی کمشنر کشمیر وجے کمار بیدھوری نے کہا کہ وادی بنگس میں ماحولیاتی سیاحت کی بے پناہ صلاحیت ہے اور ہم اسے کپوارہ میں ایک اہم کشش کے طور پر اجاگر کرنے کیلئے مزید طریقوں پر غور کر رہے ہیں۔

دورہ ہند وارہ کے دوران میڈیا نمائندوں سے بات کرتے ہوئے صوبائی کمشنر کشمیر وی کے بیدھوری نے کہا کہ شہرہ آفاق گلمرگ میں کھیلو انڈیا مقابلے شیڈول کے مطابق آگے بڑھنے کیلئے تیار ہیں۔ انہوں نے کہا” پچھلی باربرفباری میں تاخیر نے شیڈول کو متاثر کیا تھا، لیکن اس سال ہم توقع کر رہے ہیں کہ کھیل مقابلے منصوبہ بندی کے مطابق ہوں گے“۔

صوبائی کمشنر نے بنگس فیسٹیول جیسے اقدامات کے ذریعے کپوارہ میں سیاحت کو فروغ دینے کی اہمیت کو بھی اجاگر کیا، جس میں انہوں نے ذاتی طور پر گزشتہ سال شرکت کی تھی۔ انہوں نے کہا” وادی بنگس میں ماحولیاتی سیاحت کی بے پناہ صلاحیت ہے، اور ہم اسے کپوارہ میں ایک اہم کشش کے طور پر اجاگر کرنے کے لیے مزید طریقوں پر غور کر رہے ہیں“۔موسم سرما کی تیاریوں پر، بیدھوری نے یقین دلایا کہ انتظامیہ گزشتہ سال کے مقابلے بہتر سہولیات فراہم کرنے کیلئے پوری طرح تیار ہے۔ انہوں نے کہا”ہم روزانہ جائزہ لے رہے ہیں تاکہ اس بات کو یقینی بنایا جا سکے کہ تمام انتظامات اپنی جگہ پر ہیں، اور یہ موسم سرما یقینی طور پر پچھلے موسم سے بہتر ہو گا۔ “