سائبر پولیس کشمیر کی جانب سے 21 لاکھ روپے کے ڈیجیٹل فراڈ کیس کا معاملہ حل ، تین گرفتار / ایس ایس پی سرینگر

سرینگر /29نومبر / ٹی آئی نیوز

سائبر پولیس کشمیر نے 21 لاکھ روپے کے ڈیجیٹل فراڈ کیس کا معاملہ حل کرتے ہوئے پنجاب اور اتر پردیش سے تعلق رکھنے والے تین افراد کو گرفتار کر لیا اور ان سے 4لاکھ سے زائد رقم بر آمد کر لی

ایس ایس پی سرینگر امتیاز حسین نے ایک پریس کانفرنس سے خطاب کرتے ہوئے کہا کہ اس گھوٹالے کا انکشاف اس وقت ہوا جب سرینگر کے ایک بزرگ شہری نے شکایت درج کروائی، جس میں بتایا گیا کہ اسے ٹیلی کام ریگولیٹری اتھارٹی آف انڈیا (ٹرائی) اور مرکزی تفتیشی ایجنسی ( سی بی آئی ) کے اہلکاروں کی نقالی کرتے ہوئے دھوکہ دہی کا نشانہ بنایا گیا۔انہوں نے کہا ”دھوکہ بازوں نے متاثرہ شخص پر 6.8 کروڑ روپے کے من گھڑت منی لانڈرنگ کیس میں ملوث ہونے کا الزام لگایا اور انہیں دھمکانے کی کوشش کی “۔ انہوں نے کہا ” قومی راز“قرار دیتے ہوئے جعلی گرفتاری وارنٹ اور جرمانے جاری کیے اور متاثرہ کو اپنے گھر کو تالا لگانے کی ہدایت دی اور انہیںکہا کہ دوسروں کے ساتھ کسی بھی بات چیت سے گریز کریں۔

ایس ایس پی کے مطابق اس دبا کے تحت، متاثرہ شخص نے وقت سے پہلے اپنے فکسڈ ڈپازٹ کو بند کر دیا اور 21 لاکھ روپے ایک جعلی ایچ ڈی ایس بینک اکاونٹ میں ٹرانسفر کر دیے اورا اسے جھوٹی یقین دہانی کرائی کہ چند گھنٹوں کے اندر فنڈس واپس کر دیے جائیں گے۔انہوں نے کہا کہ شکایت ملنے کے بعد ایف آئی آر 26/2024در ج کی گئی اور پولیس نے جدید تکنیکی آلات کا استعمال کرتے ہوئے تفصیلی تفتیش شروع کی۔ایس ایس پی نے کہا”ٹیموں کو اتر پردیش، دہلی اور پنجاب روانہ کیا گیا، جس کے نتیجے میں شاملی (یوپی) سے گورو کمار، پٹیالہ (پنجاب) سے گرپریت سنگھ، اور اجول چوہان کو بھی پٹیالہ سے گرفتار کیا گیا۔“

انہوں نے کہا کہ آپریشن کے دوران، پولیس نے 4 موبائل فون، ایک میک بک، 13 سم کارڈ، 24 ڈیبٹ کارڈ، 20 چیک بک، 10 پاس بکس اور دیگر مجرمانہ مواد ضبط کیا۔ شکایت کنندہ کے اکاونٹ میں 4.13 لاکھ روپے کی رقم پہلے ہی واپس جاری کی جا چکی ہے۔ایس ایس پی سرینگر نے کہا کہ دیگر سازشیوں کو بے نقاب کرنے اور اس گھوٹالے کے پیچھے موجود بڑے نیٹ ورک کو ختم کرنے کیلئے مزید تحقیقات جاری ہیں۔

انہوں نے کہا کہ ” پولیس نے ایک عوامی ایڈوائزری جاری کی ہے جس میں شہریوں پر زور دیا گیا ہے کہ وہ حساس مالیاتی معلومات کا اشتراک کرتے وقت احتیاط برتیں اور اس طرح کی اسکیموں کا شکار ہونے کے خلاف خبردار کیا ہے۔انہوں نے کہا ” شہریوں کو مشورہ دیا جاتا ہے کہ وہ ایسے دعووں کی صداقت کی تصدیق کریں اور مشکوک سرگرمیوں کی اطلاع فوری طور پر قریبی سائبر پولیس اسٹیشن یا ہیلپ لائن پر دیں۔ “