ابتدائی رجحان کے مطابق عمر عبداللہ بڈگام سیٹ آرام سے جیتیں گے: آغا روح اللہ

سری نگر، 25 ستمبر

نیشنل کانفرنس کے سینئر لیڈر اور رکن پالیمان آغا سید روح اللہ کا ماننا ہے کہ جہاں تک ابتدائی رجحان کا تعلق ہے تو بڈگام اسمبلی حلقے پر عمر عبداللہ آرام سے جیت حاصل کریں گے۔انہوں نے کہا کہ انتخابات کے دوسرے مرحلے میں پہلے مرحلے سے بھی بہتر نتائج کی امید ہے۔

موصوف رکن پارلیمان نے ان باتوں کا اظہار بڈگام میں نامہ نگاروں کے سوالوں کے جواب دینے کے دوران کیا۔انہوں نے کہا: ’جو اب تک کا رجحان ہے تو بڈگام نشست سے عمر صاحب آرام سے جیت حاصل کریں گے‘۔ان کا کہنا تھا: ’ہمیں ہر جگہ اچھا رسپانس ملا ، انتخابات کے دوسرے مرحلے میں پہلے مرحلے سے بھی بہتر نتائج کی امید ہے‘۔ایک سوال کے جواب میں آغا روح اللہ نے کہا: ’لوگ اسمبلی کے ذریعے یہ آواز بھیج سکتے ہیں کہ ان کو 2019 کے فیصلے منظور نہیں ہیں‘۔

بی جے پی کی یہاں سرکار بنانے کے بارے میں پوچھے جانے پر انہوں نے کہا: ’بی جے پی کو یہاں سرکار بنانے کا کوئی چانس ہی نہیں ہے گرچہ وہ ووٹ تقسیم کرنے کی کوشش کررہے ہیں‘۔ان کا کہنا تھا کہ نیشنل کانفرنس اور کانگریس الائنس کو لوگوں کی بھر پور حمایت حاصل ہوگی۔
اپنی پارٹی کے عمر عبداللہ کو سپورٹ کرنے کے متعلق آغا روح اللہ نے کہا: ’اپنی پارٹی کی بڈگام نشست پر پی ڈی پی کو حمایت حاصل ہے جیسا کہ اس پارٹی کے صدر نے اپنے بیانات میں کہا لیکن منتظر محی الدین صاحب انفرادی طور پر عمر صاحب کو اس سیٹ پر سپورٹ کر رہے ہیں‘۔