جموں و کشمیر میں اگلی سرکار بی جے پی کی ہوگی: رویندر رینہ

جموں، 25 ستمبر

بی جے پی کے جموں و کشمیر یونٹ کے صدر رویندر رینہ کا کہنا ہے کہ جموں و کشمیر میں اگلی سرکار بی جے پی کی ہوگی۔انہوں نے بدھ کی صبح یہاں نوشہرہ میں اپنا ووٹ ڈالنے کے بعد میڈیا کے ساتھ بات کرتے ہوئے کہا: ’مجھے امید ہے کہ بی جے پی کی جیت ہوگی‘۔ان کا کہنا تھا: ’جس طرح سے وزیر اعظم نریندر مودی نے جموں و کشمیر کی تعمیر و ترقی کے لئے کام کئے ہیں اور یہاں امن و شانتی قائم کی ہے تو یقینی طور پر بی جے پی کی شاندار جیت ہوگی‘۔

مسٹر رینہ نے کہا کہ جموں و کشمیر میں اگلی سرکار بی جے پی کی ہوگی۔بتادیں کہ جموں و کشمیر میں ایک دہائی کے طویل عرصے کے بعد منعقد ہونے والے اسمبلی انتخابات کے دوسرے مرحلے کے لئے 26 حلقوں پر پولنگ شد ومد سے جاری ہے۔

حکام نے پر امن اور صاف و شفاف پولنگ کو یقینی بنانے کے لئے وسیع تر انتظامات کئے ہیں۔اسمبلی انتخابات کا تیسرا اور آخری مرحلہ یکم اکتوبر کو منعقد ہوگا جبکہ ووٹوں کی گنتی 8 اکتوبر کو ہوگی۔