راج ناتھ نے جموں و کشمیر کے ڈی جی پی سے حملے کی تفصیلات مانگی

نئی دہلی، : (یواین آئی) مرکزی وزیر داخلہ راج ناتھ سنگھ نے جموں و کشمیر کے پولیس ڈائریکٹر جنرل ایس پی وید سے ٹیلیفون پربات کرکے جموں میں فوج کے کیمپ پر ہوئے مسلح حملے کے بارے میں معلومات حاصل کیں۔

پولیس ڈائرکٹر جنرل نے مسٹر سنگھ کو فوج کے کیمپ پر مسلح حملے سے متعلق معلومات سے آگاہ کیا اور صورت حال سے نمٹنے کے لئے کی جا رہی کارروائی کی تفصیلات بتائیں۔

وزارت داخلہ کی جانب سے دی گئی اطلاع میں کہا گیا ہے کہ وزیر داخلہ اس سلسلے میں وزیر دفاع اور جموں و کشمیر حکومت کے ساتھ مسلسل رابطہ میں ہے اور وزارت حالات پر قریبی نظر رکھے ہوئے ہے۔ مسٹر سنگھ نے پولیس ڈائرکٹر جنرل سے کہا ہے کہ مرکز صورت حال سے نمٹنے میں ہر ممکن مدد دینے کے لئے تیار ہے۔

قابل غور ہے کہ جموں کے مضافات میں واقع سنجووان بریگیڈ فوج کیمپ پر آج علی الصبح مسلح حملے میں فوج کے ایک افسر سمیت چار افراد ہلاک ہو گیا اور متعددزخمی ہو گئے۔

خیال رہے چار سے پانچ مسلح جنگجوﺅں نے صبح تقریبا 4بجکر55منٹ پر سنجووان بریگیڈ فوجی کیمپ پر حملہ کر دیا۔ حملے کے بعد جائے وقوعہ کے آس پاس کے تمام اسکولوں کو احتیاطاً بند کر دیا گیا ہے۔