حاجن اور درگمولہ کی دو ضلع ترقیاتی کونسل کی نشستوں پر دوبارہ ووٹنگ 5دسمبر کو

سرینگر /16نومبر
سٹیٹ الیکشن کمیشن نے کشمیر میں دو ضلع ترقیاتی کونسل کی نشستوں پر 5دسمبر کو دوبارہ ووٹنگ کرانے کا اعلان کیا ہے ۔ تفصیلات کے مطابق شمالی ضلع بانڈی پورہ کے ڈی ڈی سی حلقہ حاجن (اے ) اور کپواڑہ کے درگمولہ حلقہ میں ضلع ترقیاتی کونسل سیٹوں کیلئے سٹیٹ الیکشن کمیشن نے دوبارہ پولنگ کا حکم دیا ہے۔اس سلسلے میں کمیشن کی جانب سے جاری کردہ حکمنامہ کے مطابق حاجن اے اور درگمولہ میں 5 دسمبر کو صبح 7 بجے سے دوپہر 2 بجے تک دوبارہ پولنگ ہوگی۔ گنتی 8 دسمبر کو ہوگی اور پولنگ کا عمل 12 دسمبر کو مکمل ہوگا۔انتخابات کے اعلان کے ساتھ ہی، ماڈل ضابطہ اخلاق کی دفعات دونوں متعلقہ ڈی ڈی سی حلقوں میں فوری طور پر نافذ ہو گئی ہیں۔قابل ذکر بات یہ ہے کہ ان دونوں حلقوں میں دیگر کے ساتھ ڈی ڈی سی انتخابات 2020 میں پولنگ ہوئی تھی، ووٹوں کی گنتی روک دی گئی جب یہ پتہ چلا کہ کچھ امیدواروں نے فارم 6 میں غلط معلومات درج کی ہیں۔ بعد ازاں دونوں حلقوں میں ہونے والی پولنگ کالعدم قرار دے دی گئی تھی اور دونوں حلقوں میں دوبارہ ووٹنگ کرانے کا اعلان کیا گیا تھا۔