تجر سوپور کے بعد کنڈی پورہ بجبہاڑہ میںمسلح تصادم آرائی کا آغاز؛ دونوں اطراف سے گولیوں کا تبادلہ جاری ، علاقے میں دو جنگجو محصور

سرینگر/10مارچ: شمالی کشمیر کے تجر سوپور علاقے میں البدر چیف کمانڈر کی ہلاکت کے محض ایک روز بعد جنوبی قصبہ بجبہاڑہ کے کنڈی پورہ علاقے میں فوج و فورسز اور جنگجوئوںکے مابین جھڑپ شروع ہوئی ۔ علاقے میں طرفین کے مابین گولیوں کا تبادلہ جاری ہے جبکہ علاقے میں دو جنگجوئوں کے پھنسے ہونے کی اطلاع موصول ہوئی ہے ۔ سی این آئی کو ذرائع سے معلوم ہوا ہے کہ کنڈی پورہ بجبہاڑہ میں دو جنگجوئوں کی موجودگی کے بعد فوج کے 3آر آر ، سی آر پی ایف اور جموں کشمیر پولیس نے بدھ کے شام دیر گئے علاقے کو محاصرے میںلیا ۔ ذرائع سے معلوم ہوا ہے کہ جونہی علاقے میں فورسز نے تلاشی آپرشن شروع کر دیا تو وہاں چھپے بیٹھے جنگجوئوں نے فرار ہونے کی کوشش میں فورسز پر فائرنگ کی جس کے ساتھ ہی علاقے میں دو بددو جھڑپ شروع ہوئی ۔ ذرائع کے مطابق اسی دوران فورسز کی اضافی کمک علاقے کی جانب روانہ کی گئی جنہوں نے پورے علاقے کو سیل کر دیا اور جنگجوئوںکے فرار ہونے کے تمام راستے سیل کر دئے گئے ۔ ذرائع نے بتایا کہ علاقے میں ایک سے دو جنگجوئوںکی موجودگی کی اطلاعات ہے اور آخری اطلاعات ملنے تک دونوں طرف سے گولیوںکا تبادلہ جاری تھا ۔ پولیس نے جھڑپ کی تصدیق کرتے ہوئے بتایا کہ علاقے میں آپریشن جاری ہے اور تمام صورتحال آپریشن ختم ہونے کے بعد ہی واضح ہو جائے گی ۔