کوٹہ پورہ شوپیان میں اعلیٰ الصبح فوج و فورسز اور جنگجوئوں کے مابین مسلح تصادم آرائی

سرینگر/10نومبر: پہاڑی ضلع شوپیان کے کوٹہ پورہ علاقے میں فوج و فورسز اور جنگجوئوں کے مابین اعلیٰ صبح مسلح تصادم آرائی میں دو جنگجو جاں بحق ہو گئے ہیں ۔ پولیس نے جھڑپ میں دو جنگجوئوں کی ہلاکت کی تصدیق کرتے ہوئے بتایا کہ مارے گئے جنگجوئوں سے اسلحہ و گولہ بارود ضبط کیا گیا ۔اسی دوران جھڑپ کی شروعات کے ساتھ ہی ضلع شوپیان میںموبائیل انٹر نیٹ خدمات بند کر دی گئی ۔ سی این آئی کے مطابق شوپیان کے کوٹہ پورہ علاقے میں دو جنگجوئوں کی موجودگی کی مصدقہ اطلاع ملنے کے بعد فوج کے 34آر آر ، سی آ ر پی ایف اور ایس او جی شوپیان نے علاقے کو منگل کی اعلیٰ صبح علاقے کو محاصرے میں لیا اور تلاشی کارورائی شروع کر دی ۔ ذرائع سے معلو م ہوا ہے کہ منگل کی اعلیٰ الصبح جونہی علاقے میں تلاشی آپریشن شروع کر دیا گیا تو وہاں موجود جنگجوئوں نے فرار ہونے کی کوشش کی اور فوج و فورسز پر شدید فائرنگ کی ۔ ذرائع کے مطابق علاقے میں فائرنگ شروع ہوتے ہی فوج و فورسز نے مورچہ زن ہوکر جوابی کارروائی کی اور اس طرح سے علاقے میں دو بددو جھڑپ شروع ہوئی ۔ ذڑائع کے مطابق جھڑپ شروع ہونے کے ساتھ ہی گولیوں کی گن گرج سے پورا علاقہ لرز اٹھا جبکہ فوج و فورسز نے پورے علاقے کو سیل کرکے جنگجوئوں کے فرار ہو نے کے تمام راستے سیل کر دئے اور فوج کی اضافی کمک طلب کرکے آپریشن کو وسیع کر دیا گیا ۔ اسی دوران ذرائع سے معلو م ہوا ہے کہ رہائشی مکان میں محصور جنگجوئوں کے والدین کو بھی طلب کر لیا گیا اور انہوں نے خود سپردگی کرنے کی پیشکش کی گئی تاہم انہوں نے پیشکش ٹھکرادی اور فائرنگ کی جس کے ساتھ ہی علاقے میں جھڑپ دوبارہ شروع ہوئی ۔ ذرائع کے مطابق علاقے میں طرفین کے مابین گولیوں کا تبادلہ قریب ایک گھنٹے تک جاری رہا جس کے بعد جونہی علاقے میں گولیوں کا تبادلہ تھم گیا تو جھڑپ کے مقام سے دو جنگجوئوں کی نعشیں بر آمد کر لی او ر ان کے قبضے سے اسلحہ و گولہ بارود بھی ضبط کر لیا گیا ۔پولیس کے ایک سنیئر آفیسر نے جھڑپ کی تصدیق کرتے ہوئے بتایا کہ محاصرے میں موجود جنگجووں کو سرنڈر کرنے کی پیشکش کی گئی جو انہوں نے ٹھکراکر فورسز پر گولیاں چلائیں۔انہوں نے بتایا کہ جھڑپ کے دوران دو جنگجوئوں جاں بحق ہو گئے جن کی نعشیں بر آمد کر لی گئی ہے ۔اور ان کے قبضے سے ہتھیار اور دیگر قابل اعتراض مواد ضبط کر لیا گیا ہے ۔ دریں اثناء شوپیان ضلع میں انٹرنیٹ سروس کو معطل کیا گیا ہے۔