ماہ مبارک کے پہلے ہی روز مرغ اور سبزیوں کے نرخوں میں اضافہ

سرینگر/25اپریل: ماہ مبارک کے پہلے ہی روز مرغ اور سبزی فروشوں نے اشیاء ضروریہ کی نرخوں میں یکایک اضافہ کردیا ۔ راتوں رات سبزی اور مرغ کی قیمتوں میں اضافہ کرنے پر لوگوں نے سخت برہمی کااظہار کرتے ہوئے کہا ہے کہ اس مہاماری کے دور میں بھی ناجائز منافع خور اور خود غر ض عناصر سادہ لوح عوام کو لوٹنے میں مصروف ہے۔ کرنٹ نیوز آف انڈیا کے مطابق ماہ مبار شروع ہونے سے قبل بازاروں میں مرغ، سبزیوں اور میوہ جات کے دام جو تھے راتوں رات ان نرخوں میں یکایک اضافہ کردیا گیا ہے ۔ذرائع کے مطابق ٹماٹر جو ماہ مبارک کے صرف ایک دن پہلے 25روپے فی کلو کے حساب سے فروخت کی جارہی تھی آج 40روپے فی کلو کے حساب سے مارکیٹ میں دستیاب ہے ۔ پالک ، ساگ، مولی اور گاجر کے دام بھی اسی طرح بڑھائے گئے ہیں جبکہ مرغ 90روپے سے 100روپے فی کلو کے حساب سے فروخت ہورہا تھا ماہ مبارک شروع ہوتے ہی اس کے دام میں بھی پر لگ گئے اور مرغ فروشوں نے اس کی قیمت 130روپے کردی ۔ اسی طرح کیلے بازار وں میں 70روپے سے 80روپے فی درجن کے حساب سے فروخت کئے جارہے تھے آج 100روپے میں بک رہی ہے ۔ اشیاء ضروریہ کی قیمتوں میں یکایک اضافہ پر عوامی حلقوںنے سخت برہمی کااظہار کرتے ہوئے کہا ہے کہ اس کورروناوائرس کی مہاماری سے ایک طرف لوگ سخت ذہنی دبائو میں مبتلاء ہیں تو دوسری طرف ناجائز منافع خوروںنے عام لوگوں کی قوت خریداری ہی ختم کردی ہے کیوں کہ ایسے دکانداروں کی جانب سے راتو رات نرخوں میں اضافہ کیا جارہا ہے اور اس کیلئے ان سے کوئی کچھ پوچھنے والا بھی نہیں ہے۔ انہوں نے کہا کہ قیمتوں پر کنٹرول سرکاری اداروں کا ہونا چاہئے اور نرخوں میں کمی یا اضافہ کا اختیار بھی انہیں اداروں کو ہونا چاہئے لیکن اس کے برعکس خود غرض عناصر لوگوں کا خون چوسنے کے شوقین اشیاء ضروریہ کی قیمتوں میں خود ہی اضافہ کرتے ہیں جس عام انسان سے سراسر ناانصافی ہے ۔ لوگوںنے اس سلسلے میں محکمہ فوڈ کے متعلقہ ذمہ داروں ، محکمہ مال، اور پویس کے اعلیٰ افسران سے اپیل کی ہے کہ وہ قیمتوں کو اعتدال رکھنے کیلئے اقدامات اُٹھائیں۔