عالمی وبا کورونا وائرس کی سنگین صورتحال، متحدہ مجلس علماء نے ائماء مساجد کے نام ہدایت جاری کی

سرینگر/ 18مارچ : جموںوکشمیر متحدہ مجلس علماء (جس کی قیادت نظر بند میرواعظ کشمیر ڈاکٹر مولوی محمد عمر فاروق کرتے ہیں) نے عالمی وبا کورونا وائرس کی سنگین صورتحال پر گہری فکر و تشویش کا اظہار کرتے ہوئے اپنے ایک مشترکہ بیان میں موجودہ حالات میں جموںوکشمیر کے ائمہ مساجد، علماء خطیبوں، مسجد کمیٹیوں اور عوام الناس سے گزارش کی ہے کہ وہ اس مرحلے پر اپنے ہمت و حوصلے بلند رکھنے کے ساتھ ساتھ قادر مطلق اللہ تبارک و تعالیٰ کے حضور توبہ و استغفار کے ساتھ ساتھ دعائوںکا اہتمام کریںتاکہ وہ نہ صرف ملت اسلامیہ بلکہ پوری انسانیت کو موجودہ سنگین عالمی وبا کورونا وائرس کی خطرناک بیماری سے محفوظ رکھے اور پوری دنیا میں صحت و سلامتی کی فضا بحال ہو اور خوف و دہشت سے نجات ملے۔ اس حوالے سے مجلس علماء نے جموںوکشمیر میں دینی اجتماعات کے تئیں منتظمین ، ائمہ مساجد ،علماء اور خطیبوںسے اپیل کی ہے کہ وہ اس ضمن میں دی گئیں ہدایات اور احتیاطی تدابیر پرسختی کے ساتھ عمل کریں۔انہوں نے کہابڑے بڑے اجتماعات کے انعقاد سے گریز کریں،جبکہ جمعہ کی نماز میں عربی خطبہ انتہائی مختصر اور دعا صرف موجودہ وبا سے بچنے کیلئے کی جائے۔ نیز کہا گیالوگ سنتیں اور نوافل گھر سے پڑھ کر آئیں، فرض کی ادائیگی کے فوراً بعد مسجد پاک کو خالی کریں ۔تلاوت اور ذکر و اذکار کے معمولات انفرادی طور پر گھروں میں جاری رکھیںاورانفرادی طور اللہ تعالیٰ کی طرف رجوع اور توبہ و استغفار معمولات میں شامل کریں،جبکہعمر رسیدہ بزرگ اور بیمار افراد اپنے گھروں میں ہی قیام کریں۔ بیان میں کہا گیا کہ سلام مسنون کا اہتمام کریں ، مصافحہ اور معانقہ (گلے ملنے)سے احتیاط برتیں جبکہ مساجد میں آنے سے قبل اور نکلنے کے بعد اپنے ہاتھوںکو صابن سے دھوئیں اور تعزیتی اور تہنیتی مجالس و محافل کو محدود اور مختصر کریں۔انہوں نے کہا طبی ماہرین کے مشوروں پر سختی سے عمل کریں۔ جبکہ تاجر برادری ،دکاندار اور دوا فروش(Medical Store) صابن اورSanitizerکی ذخیرہ اندوزی سے گریز کریں نیزصاحب خیر اور متمول حضرات سے گزارش کی گئی کہ وہ فی سبیل للہ مساجد ،خانقاہوں، آستانوں اور امام باڑوں میں Sanitizer مہیا رکھیں۔انہوں نے متعلقہ محکموں (میونسپل کارپوریشن) پر زور دیا جاتا ہے کہ وہ موجودہ سنگین حالات کے پیش نظر جہاں جہاں بڑے دینی اجتماعات ہوتے ہیں وہاں صاف ستھرائی اورSanitization کا خصوصیت سے اہتمام کریں۔