درجہ حرارت میں کمی سے وادی پھر سردی کی لپیٹ میں ، آئندہ 24گھنٹوں تک مزید بارشوں کا امکان /محکمہ موسمیات

موسم نے پھر بدلی کروٹ ،بالائی علاقوں میں تازہ برفباری جبکہ میدانی علاقوں میں بارشیں

سرینگر: موسم نے ایک بار پھر کروٹ بدلتے ہوئے پیر پنچال کے آر پار پہاڑی علاقو ں میں تازہ برفباری جبکہ میدانی علاقوں میں موسلا دھار بارشوں سے معمول کی زندگی بری طرح سے متاثر ہوئی۔اس دوران اتوار کی صبح سے موسم میں بہتری آنے کی پیشگوئی کے بیچ محکمہ موسمیات نے بالائی علاقوں میںبرفانی تودے گرآنے کی تازہ وارننگ جاری کرتے ہوئے لوگوں سے احتیاط برتنے کی تلقین کی گئی ہے۔ ادھر متواتر بارشوںکے نتیجے میں وادی کشمیر میں یکا یک موسمی مزاج تبدیل ہوا اور پوری وادی میں درجہ حرارت میں گراوٹ ریکارڈ کرنے سے غیر معمولی ٹھنڈ محسوس کی جارہی ہے۔کرنٹ نیوز آف انڈیا کے مطابق محکمہ ٹنل کے آر پار موسمی صورتحال میں ایک بار پھر تبدیلی آتے ہوئے گزشتہ شب سے ہی بالائی علاقوں میں رواں موسم کی تازہ برفباری اور میدانی علاقوں میں بارشوں کا آغاز ہواجو بدھ کو بھی وقفے وقفے سے دن بھر جاری رہا۔پہاڑی علاقوں سے تازہ برفباری کی اطلاعات موصول ہوئی ہیں۔ صحت افزاء مقام گلمرگ ، کونگہ ڈوری ، کھلن مرگ، افروٹ پہاڑیوں اور بابا ریشی کے ملحقہ علاقہ جات میں بھی دوران شب برفباری ہوئی۔کپوارہ میں وادی بنگس ،زیڈ گلی، نوگام سیکٹر،چوکی بل ،سادھنا ٹاپ ،فرکیاں گلی ،میلیال ،مڑھل اور اس کے مضافاتی علاقوںجبکہ بانڈی پورہ میں گریز اور اس کے گردونواح میں برفباری ہونے کی اطلاع ہے۔اس دوران سرینگر سمیت بیشتر میدانی علاقوں میں موسلا دھار بارشیں ہوئیں جس کے نتیجے میں درجہ حرارت میں کمی واقع ہونے سے سردی کی شدید لہر دوڑ گئی۔ادھر محکمہ موسمیات کا کہنا ہے کہ تازہ برفباری اور بارشوں کا سلسلہ مزید کچھ دنوںتک جاری رہنے کا امکان ہے۔سرینگر میں محکمہ کے ایک آفیسر نے بتایا کہ مغربی ہوائیں ریاست کی فضائیں پر اثر انداز ہوچکی ہیں اور اسی کے نتیجے میں موسم نے کروٹ بدلی ہے۔انہوں نے کہا کہ اتوارکی صبح سے موسم میں تبدیلی آنے کے امکانات ہے محکمہ کے ڈائریکٹر سونم لوٹس نے بتایا کہ گھبرانے کی کوئی بات نہیں ہے ، البتہ لوگوں کو احتیاط سے کام لینا چاہئے۔دریں اثناء صوبائی انتظامیہ نے اوپری علاقوں میں برفانی تودے گرنے کا خدشہ ظاہر کیاہے اور لوگوں کو ہدایت دی گئی ہے کہ وہ مجبوری کی حالت میں گھروں سے باہر آنے کے دوران انتہائی احتیاط سے کام لیں۔اس دوران میدانی علاقوں میں موسلادھار بارشوں کے نتیجے میں درجہ حرارت میں یکا یک گراوٹ محسوس کی گئی۔ درجہ حرارت میں آئی گراوٹ سے وادی کشمیر میں غیر معمولی ٹھنڈ محسوس کی جارہی ہے اور لوگ بارشوں سے بچنے کیلئے جہاں چھاتوں اور رین کوٹوں کا استعمال کررہے ہیں وہیں غیر معمولی سرحدی سے بچنے کیلئے لوگوںنے ایک بار پھر گرم ملبوسات زیب تن کرنا شروع کردئیے ہیں۔