پاکستان اور بھارت مزید فوجی کارروائی سے گریز کریں/ امریکی وزیر دفاع

امریکا کا پاکستان اور بھارت سے خطے میں امن اور سلامتی برقرار رکھنے پر زور

سرینگر: امریکہ نے ایک مرتبہ پھر اس بات پر زور دیا کہ پاکستان اور بھارت مزید فوجی کارروائی سے گریز کریں۔سی این آئی مانیٹرنگ کے مطابق امریکی خبررساں ادارے کے مطابق قائم مقام امریکی وزیر دفاع پیٹرک شناہان نے پاک بھارت کشیدگی میں کمی لانے پر دھیان مرکوز رکھتے ہوئے دونوں ممالک پر زور دیاہے کہ وہ مزید فوجی اقدام سے گریز کریں۔پیٹرک شناہان نے اس صورتحال کے بارے میں اعلیٰ امریکی فوجی حکام سے بھی بات کی ہے جب کہ پیٹرک شناہان امریکی وزیر خارجہ مائیک پومپیو، جان بولٹن، امریکی جوائنٹ چیف ا?ف اسٹاف جنرل جوزف ایف ڈنفرڈ، انڈو پیسیفک کمان کے سربراہ ایڈمرل فل ڈیوڈ سن اورسنیٹکام کے سربراہ جنرل جوزف وٹل سے بھی رابطے میں ہیں۔دوسری جانب امریکی دفتر خارجہ کی ترجمان ہیلینا وہائٹ کا کہنا ہے کہ وزیر خارجہ مائیک پومپیو نے پاک بھارت وزرائے خارجہ سے رابطہ کیا ہے جس کے دوران انہوں نے دونوں ممالک سے خطے میں امن و سلامتی برقرار رکھنے پر زور دیاہے۔امریکی دفتر خارجہ کی جنوبی ایشیا کی ترجمان ہیلینا وہائٹ کاکہنا ہے کہ بھارت اور پاکستان کے درمیان کشیدگی کے تناظر میں وزیر خارجہ مائیک پومپیو نے 26 فروری کو بھارت کی دہشتگردی کے خلاف کارروائی کے بعد بھارتی ہم منصب سشما سوراج سے بات کی ہے جس کے دوران انہوں نے دونوں ممالک کے سیکیورٹی معاملات اورخطے میں امن و سلامتی قائم رکھنے کے مشترکہ مقصد میں قریبی تعاون پر زور دیا ہے۔امریکی وزیر خارجہ نے پاکستانی وزیر خارجہ شاہ محمود قریشی سے بھی بات کی جس میں انہوں نے بھارت اور پاکستان کے درمیان حالیہ کشیدگی کو فوجی کارروائی سے پرہیز کرتے ہوئے ترجیح بنیادوں پر کم کرنے پر زور دیا۔پومپیو نیدونوں وزرائے خارجہ سے کہا امریکا پاکستان اور بھارت سے برداشت سے کام لیتے ہوئے کشیدگی کو ہرقیمت پر بڑھنے سے روکنے کی حوصلہ افزائی کرتاہے۔ انہوں نے دونوں ممالک کے وزرائے خارجہ سے براہ راست رابطے اور فوجی کارروائی سے پرہیز کرنے کی بھی حوصلہ افزائی کی ہے۔