شہر سرینگر میں پے در پے گرینیڈ حملوں کے بعد پولیس نے کی ایڈوائزری جاری

چیکنگ پوائنٹوں پر پولیس کی تلاشی و پوچھ تاچھ کے دوران عوام تعاون کریں اور اس کو ہراسانی کا نام نہ دیں

سرینگر/18جنوری : راجباغ اور لالچوک میں دو دنوں میں دو گرینیڈ حملوں کے بعد 26جنوری کی تقریبات کو احسن طریقے سے منعقدکرنے اور کسی بھی ممکنہ حملے کو روکنے کیلئے پولیس نے ایڈوائزری جاری کرتے ہوئے اپنے افسروں کو 24گھنٹے متحرک رہنے کی ہدایت کرتے ہوئے لوگوں سے اپیل کی ہے کہ پولیس ناکوں پر پولیس عملہ کے ساتھ تعاون کریں اور پولیس کی پوچھ تاچھ کو ہراسانی نہ سمجھیں ۔ کرنٹ نیوز آف انڈیا کے مطابق جنوری26کے سلسلے میں ممکنہ جنگجو حملوں کو مد نظر رکھتے ہوئے پولیس نے اپنے افسران کو ایڈوائزری جاری کرتے ہوئے چوبیسوں گھنٹے چوکس رہنے کی ہدایت دی ہے۔ ایڈوئزری پر عمل کرتے ہوئے شہر میں جگہ جگہ ناکے لگائے گئے ہیں جہاں لوگوں کی چیکنگ کی جارہی ہے۔ ایسے ہی ناکے سرینگر سے باہر وادی کے دیگر ضلع و تحصیل صدر مقامات میں بھی لگائے گئے ہیں۔ پولیس کی طرف سے جاری ایڈوائزری میں لوگوں سے ناکوں پر تلاشیوں کے دوران تعاون کی اپیل کی گئی ہے۔سی این آئی کے مطابق ایڈوائزری میں تعلیمی اداروں کو بتایا گیا ہے کہ وہ کسی اجنبی کو داخل نہ ہونے دیں اور طالب علموں کو خصوصی ہدایات دیں۔پولیس نے لوگوں سے اپیل کی ہے کہ وہ اجنبی اور لاوارث چیزوں کو ہاتھ نہ لگائیں اور کسی بھی مشکوک چیز یا شخص کو دیکھنے پر پولیس کو اطلاع دیں۔ایڈوائزری میں کہا گیا”اگر آپ کے پاس کسی قوم دشمن یا سماج دشمن عنصر کی کوئی اطلاع ہے تو برائے مہربانی نزدیکی تھانے سے رابطہ کریں یا 100گھمائیں ”۔پولیس نے مسافر گاڑیوں میں سفر کرنے والوں سمیت جملہ لوگوں کو بازار،شاپنگ مالوں، ریلوے سٹیشنوں، بس اسٹینڈوں اور دیگر عوامی مقامات پر چوکسی برتنے کی ہدایت دی ہے۔پولیس نے تمام پولیس تھانوں کے سٹیشن ہائوس افسران اورپوسٹ انچارجوں کو چوبیسوں گھنٹے ڈیوٹی پر حاضر رہنے کی ہدایت جاری کی ہے۔ولیج ڈیفینس کمیٹی ممبران، لمبرداروں، چوکیداروں کو بھی پولیس کے ساتھ تعاون کی اپیل کی گئی ہے تاکہ آنے والے26جنوری کے سلسلے میں لوگوں کی حفاظت یقینی بنائی جاسکے۔یاد رہے کہ گذشتہ روز سرینگر کے راجباغ علاقے میں ہوئے گرنیڈ دھماکے میں ایک پولیس افسر سمیت تین اہلکار زخمی ہوئے تھے جبکہ اس کے ایک دن بعد آج لالچوک میں گھنٹہ گھر کے قریب ایک اور گرنیڈ پھینکا گیا تاہم اس میں کسی کے زخمی ہونے کی کوئی اطلاع نہیں ملی تاہم اس میں کئی گاڑیوں اور دکانات کو جزوی نقصان پہنچا ہے ۔پے درپے گرنیڈ حملوں کو مد نظر رکھتے ہوئے 26جنوری کی تقریبات کے دوران ممکنہ تشدد آمیز واقعات کو روکنے کیلئے پولیس و دیگر فورسز متحرک ہوگئے ہیں اور شہر سرینگر میں شبانہ ناکے اور تلاشی کارروائیوں کا سلسلہ شروع کرتے ہوئے عوام سے اپیل کی گئی ہے کہ وہ پولیس کے ساتھ تعاون کریں۔